आर्थिकन्यूज
काठमाडौं । धितोपत्र दोस्रो बजार सञ्चालक नेपाल स्टक एक्सचेञ्ज (नेप्से) ले मार्जिन कारोबारका लागि योग्य कम्पनीहरुको धितोपत्रको सूची सार्वजनिक गरेको छ ।
माघ १५ गते नेप्सेले मार्जिन कारोबारका लागि योग्य १०२ कम्पनीको धितोपत्रको सूची सार्वजनिक गरेको हो । नेप्सेमा हाल २४४ कम्पनीको धितोपत्र सूचीकृत रहेको नेप्सले जानकारी दिएको छ । यी मध्ये २०२ कम्पनीको धितोपत्र मात्र मार्जिन कारोबारका लागि योग्य रहेको जानकारी नेप्सेले दिएको छ । मार्जिन कारोबार सुविधा सम्बन्धी कार्यविधि , २०७५ को परिच्छेद ३ को दफा ८ बमोजिम मापदण्ड पुरा गरेका कम्पनीहरुको धितोपत्र मात्र मार्जिन कारोबारका लागि योग्य हुने व्यवस्था छ । मार्जिन कारोबारयोग्य धितोपत्र सम्बन्धी व्यवस्थामा मार्जिन कारोबार सेवा उपलब्ध गराउने धितोपत्र दलाल व्यवसायीले नेप्सेले तोकेको कम्पनीको धितोपत्रमा मात्र सूविधा प्रदान गर्नुपर्ने हुन्छ ।
नेप्सेले कम्तिमा १० हजार शेयरधनी भएको , कम्पनीको खुद सम्पत्ति चुक्तापूँजीभन्दा कम नरहेको , पछिल्लो दुई आर्थिक वर्षमा कम्तिमा दश प्रतिशत लाभांश वितरण गरेको , दोस्रो बजारमा अघिल्लो आथिृक वर्षभर कम्तिमा ८० प्रतिशत कारोबार दिनमा शेयर कारोबार भएको र आर्थिक वर्षको प्रथम ६ महिनाभित्रै वार्षिक साधारण सभा सम्पन्न गरेको कम्पनीलाई मात्र मार्जिन कारोबारका लागि योग्य कम्पनीको रुपमा सार्वजनिक गर्ने गर्दछ ।
नेप्सेले प्रत्येक आर्थिक वर्षका लागि मार्जिन कारोबारयोग्य धितोपत्रको सूची सार्वजनिक गर्नुपर्दछ भने प्रत्येक आर्थिक वर्ष समाप्त भएको सात महिनाभित्र ती कम्पनीहरुको सूचीलाई अद्यावधिक समेत गर्नुपर्दछ । सूची अद्यावधिक गर्दा कुनै कम्पनी मौजुदा सूचीबाट हट्न गएमा त्यस्तो कम्पनीका लागि प्रदान गरेको मार्जिन सुविधा तीन कार्य दिनभित्र राफसाफ गर्नुपर्ने व्यवस्था छ ।
नेप्सेले सार्वजनिक गरेको १०२ कम्पनीको धितोपत्र सूचीभित्र सूचीकृत १९ वाणिज्य बैंकहरुमध्ये तीन बैंक समेटिन सकेका छैनन् । प्रभु बैंक, लक्ष्मी सन्राईज बैंक र प्राइम कमर्सियल बैंक मार्जिन कारोबार सुविधाका लागि अयोग्य कम्पनीको सूचीमा परेका हुन । वित्त कम्पनीतर्फ भने आईसिएफसी फाइनान्सको धितोपत्रमात्र मार्जिन कारोबारका लागि योग्य सावित भएको छ । विकास बैंक तर्फ ६ कम्पनीको धितोपत्र योग्य हुँदा लघुवित्त तर्फका ३४ कम्पनीको धितोपत्र मार्जिन कारोबारका लागि योग्य भएको छ ।
जीवन बीमा तर्फ ९ र निर्जीवन बीमा तर्फपनि ९ कम्पनीको धितोपत्र मार्जिन कारोबारका लागि योग्य रहेको नेप्सेको भनाई छ । त्यस्तै लगानी समूहका चार, उत्पादन तथा प्रशोधन समूहका चार, जलविद्युत तर्फका १५ , होटल तथा पर्यटन तर्फका २ र अन्यतर्फका २ कम्पनीमात्र मार्जिन कारोबारयोग्य कम्पनीको धितोपत्र सूचीमा परेका छन् । नेप्सेले मार्जिन कारोबारका लागि योग्य कम्पनीको सूची सार्वजनिक गरेपनि यो सुविधा भने कुनै पनि ब्रोकर कम्पनीहरुले प्रदान गरेका छैनन् ।
