आर्थिकन्यूज
काठमाडौं । पछिल्लो ३ कारोबार दिनमा ११० अंक माथि उक्लिएको नेप्सेमा अल्पकालिन लगानीकर्ताहरु नाफा सुरक्षित गर्नतर्फ केन्द्रीत हुन सूचकसँगै कारोबारमा समेत गिरावट आएको छ । नेप्सेमा नयाँ सीईओ नियुक्तीको खबरले शेयर लगानीकर्तामा खासै उत्साह जगाउन सकेन् ।
मंगलबार नेप्से सूचक १६.९५ विन्दुले घटेर २६६७.१७ अंकमा आएको छ । ५ अर्ब ७९ करोड रुपैयाँभन्दा बढीको शेयर कारोबार भएको बजारमा एउटा कम्पनीको सकारात्मक सर्किट लेबलमा कारोबार भएको छ । ट्रेड्रिङबाहेक बाँकी सबै समूहका सूचक घटेका छन् । सर्टट्रम इन्भेष्टर हाबी भएको बजारमा बिक्रीचाप परेपछि अधिकांस समूहमा गिरावट आएको हो ।
नेप्सेका नवनियुक्त प्रमुख कार्यकारी अधिकृत (सीईओ) चूडामणि चापागाईँले आजै मात्र पद बहाली गरेका छन्। मंगलबार अर्थ मन्त्रालय गएर नियुक्ति पत्र बुझेका चापागाईँले मंगलबार नै नेप्से पुगेर पद बहाली गरेका हुन्। अर्थ सोमबार बसेको मन्त्रिपरिषद् बैठकले चापागाईँलाई सीईओमा नियुक्त गर्ने निर्णय गरेको थियो। नेप्सेले नयाँ सीईओ पाएपनि यसले शेयर लगानीकर्तामा भने खासै सकारात्मक प्रभाव पार्न सकेन् ।
नेप्सेसँगै यस दिन कारोबार रकम पनि घटेको छ । अघिल्लो कारोबार दिन गत आइतबार साढे ७ अर्बको शेयर खरिदबिक्री भएको बजारमा आज ५ अर्ब ७९ करोड ७७ लाख बराबरको १ करोड ६ लाख ७० हजार कित्ता शेयर खरिदबिक्री भएको छ । १३ उपसमूहमध्ये यस दिन १२ उपसमूहको परिसूचक घटेको छ भने एक उपसमूहको परिसूचक बढेको छ ।
यस दिन गार्डियन माइक्रो लाइफ इन्स्योरेन्सको शेयर सकारात्मक सर्किट लेभलमा कारोबार भएको छ। कम्पनीले शतप्रतिशत हकप्रद शेयर निष्काशन गर्ने घोषणा गरेसँगै शेयरमूल्य बढ्न पुगेको हो। गुराँस लघुवित्त वित्तीय संस्थाको शेयरमूल्य सर्वाधिक ५.५६ प्रतिशत घटेको छ । कारोबार रकमका आधारमा यस दिन हिमालयन रि इन्स्योरेन्स शीर्ष स्थानमा रहेको छ। सो कम्पनीको यस दिन ६४ करोड २५ लाख रुपैयाँबराबरको शेयर कारोबार भएको छ ।
