आर्थिकन्यूज
काठमाडौं । सरकारले चालु आर्थिक वर्षको १० महिनाको अवधिमा ३ खर्ब ९० अर्ब ऋण लिएर ३ खर्ब ८ अर्ब ऋण तिरेको छ । सार्वजनिक ऋण व्यवस्थापन कार्यालयको मासिक प्रतिवेदन अनुसार चालु आर्थिक वर्षको साउन देखि वैशासम्ममा सरकारको कुल तिर्न बाँकी २६ खर्ब २२ अर्ब ४० करोड ३७ लाख रहेको छ ।
सरकारले चालु आर्थिक वर्षमा ५ खर्ब ४७ अर्ब सार्वजनिक ऋण परिचालन गर्ने लक्ष्य राखिएकोमा वैशाख मसान्तसम्ममा ३ खर्ब ९० अर्ब ८३ करोड ऋण प्राप्ति गरेको छ । वार्षिक लक्ष्यको आधारमा कुल सार्वजनिक ऋण प्राप्ति ७१.४५ प्रतिशत छ । यस अवधिमा सरकारले ३ खर्ब १ अर्ब १४ करोड आन्तरिक ऋण तथा ८९ अर्ब ६८ करोड बाह्य ऋण प्राप्ति गरेको छ । जसमा आन्तरिक ऋण प्राप्ति लक्ष्यको ९१.२५ प्रतिशत तथा बाह्य ऋण प्राप्ति लक्ष्यको ४१.४३ प्रतिशत रहेको छ ।
यस्तै, चालु आर्थिक वर्ष २०८१/८२ मा ऋण सेवा खर्चमा ४ खर्ब २ अर्ब वार्षिक बजेट रहेकोमा वैशाख मसान्तसम्म ३ खर्ब ८ अर्ब १४ करोड भुक्तानी भएको छ । यो वार्षिक बजेट विनियोजनको आधारमा ७६.४९ प्रतिशत हो । कुल ग्राहस्थ उत्पादनको आधारमा कुल ऋण सेवा खर्च ५.०५ प्रतिशत हो ।
चालु आवको १० महिनामा सरकारले २ खर्ब ६५ अर्ब ६७ करोड आन्तरिक ऋण तथा ४२ अर्ब ४७ करोड बाह्य ऋणको दायित्व घटाएको छ । वैशाखमसान्तसम्म साँवा भुक्तानीमा २ खर्ब ५० अर्ब ७१ करोड र ब्याज भुक्तानीमा ५७ अर्ब ४२ करोड रुपैयाँ खर्च भएको छ ।
चालु आर्थिक वर्षको १० महिनामा पौने २ खर्ब सार्वजनिक ऋण थपिएको छ । साउन देखि वैशासम्ममा सार्वजनिक ऋण १ खर्ब ८८ अर्ब ३० करोड रुपैयाँ थपिएको हो । योसँगै वैशाख मसान्तसम्म कुल तिर्न बाँकी सार्वजनिक ऋण २६ खर्ब २२ अर्ब ४० करोड रुपैयाँ पुगेको छ । २०८१ साउन १ गतेसम्म २४ खर्ब ३४ अर्ब ९ करोड तिर्न बाँकी ऋण रहेको थियो ।
नेपालको अर्थतन्त्रको आकारको अनुपातमा तिर्न बाँकी सार्वजनिक ऋण कुल गार्हस्थ्य उत्पादन (जीडीपी) को ४२.९४ प्रतिशत हो । यसमध्ये आन्तरिक ऋण जीडीपीको २२.२० र बाह्य २३.७६ प्रतिशत छ । यस अवधिसम्म सरकारको तिर्न बाँकी आन्तरिक ऋण १२ खर्ब ६६ अर्ब ७० करोड रुपैयाँ तथा बाह्य ऋण भने १३ खर्ब ५५ अर्ब ६९ करोड रुपैयाँ छ ।
कुल सार्वजनिक ऋणमा वैशाख मसान्तसम्ममा वैदेशिक ऋणको हिस्सा ५१.६९ प्रतिशत तथा आन्तरिक ऋणको हिस्सा ४८.३१ प्रतिशत रहेको कार्यालयले जनाएको छ । गत साउन १ गतेसम्म तिर्न बाँकी आन्तरिक ऋण ११ खर्ब ८० अर्ब ९० करोड र वाह्य ऋण १२ खर्ब ५३ अर्ब १९ करोड थियो ।
सरकारले चालु आर्थिक वर्षमा ५ खर्ब ४७ अर्ब सार्वजनिक ऋण परिचालन गर्ने लक्ष्य राखेको छ । त्यसमध्ये ३ खर्ब ३० अर्ब आन्तरिक ऋणबाट र वैदेशिक ऋणबाट २ खर्ब १७ अर्ब ६७ करोड ऋण जुटाइने बजेटमा उल्लेख छ । यस वर्ष सरकारले १८ खर्ब ६० अर्ब ३० करोड बराबरको बजेट कार्यान्वयन गरिरहेको छ । अर्धवार्षिक बजेट समीक्षामार्फत सरकारले बजेटको आकार झण्डै दश प्रतिशतले घटाइएको छ ।
