आर्थिकन्यूज
मन्त्रालयका प्रवक्ता डण्डुराज घिमिरेले भने ड्राइभरले गाडी मन्त्रालयमा आफै लिएर आएको बताए । गाडी कहाँ फेला प¥यो, कसले चोरेको रहेछ, कारवाही के हुन्छ भन्ने प्रश्नमा उनले भने ‘गाडी आयो, आएपछि हामीले यस विषयमा थप सोधखोज गरेनौ । गाडी पाई सकेपछि थप सोधखोज गर्नु नै परेन नी,’ उनले भने ।
काठमाडौं । श्रम, रोजगार तथा सामाजिक सुरक्षा मन्त्री शरदसिंह भण्डारीले सरकारी गाडी लोकतान्त्रिक समाजवादी पार्टी (लोसपा) का अध्यक्ष महन्थ ठाकुरको छोरी मिनाक्षी ठाकुर (झा) लाई उपहार दिएका छन् । अध्यक्ष ठाकुरले लगातार दोस्रो पटक पनि श्रम मन्त्री बन्ने अवसर दिए बापत मन्त्री भण्डारीले उनकी छोरीलाई श्रम मन्त्रालयको गाडी नै उपहार दिएका हुन् । मन्त्रालय स्रोतका अनुसार यस पटक सर्वोन्द्रनाथ शुक्लाको पालो मिचेर अध्यक्ष ठाकुरले भण्डारीलाई मन्त्री बनाई दिएका थिए ।
मन्त्री बन्ने अवसर दिए बापत मन्त्री भण्डारीले श्रम मन्त्रालयको महिन्द्रा स्कोर्पियो (प्रदेश ३–०१–००२ झ ५३६७) नम्बरको गाडी अध्यक्षकी छोरी मिनाक्षीलाई उपहार टक्राएका हुन् । निजी प्रयोजनका लागि मन्त्री भण्डारीले उपहार दिएको मन्त्रालय स्रोतले बतायो । भण्डारी यस अघि मन्त्री हुँदा पार्टी अध्यक्ष ठाकुरको छोरी मिनाक्षीलाई वैदेशिक रोजगार बोर्डको सञ्चालक समितिको सदस्य समेत नियुक्त गरेका थिए ।
त्यतिमात्रै हैन मन्त्री भण्डारीले पार्टी अध्यक्ष ठाकुरका भान्जा राकेश झालाई निजी सचिव नियुक्त गरेका छन् । ठाकुरको नाति देखि पिएको छोरालाई आईटी इन्जिनियर नियुक्त गरेको स्रोतको दाबी छ । बोर्डको तलब भत्ता खाने गरी एक जना अधिवक्तालाई समेत नियुक्ती गरिएको स्रोतले बतायो । भण्डारी यस अघि श्रममन्त्री हुँदा पार्टी अध्यक्ष ठाकुरको सवारी चालकलाई पनि बोर्डबाट नै तलब खाने व्यवस्था गरिएको मन्त्रालय स्रोतले बतायो ।
मन्त्री भण्डारीले अध्यक्ष ठाकुरकी छोरीलाई यस अघि दुबई र जापान पनि भ्रमण गराई सकेका छन् । दुबई रोजगार मेलामा सहभागी हुन भन्दै भण्डारीले उनलाई दुबई लगेका थिए । तर, उनी कार्यक्रममा सहभागी नै नभएको मेलाका एक सहभागीले बताए ।
सचिव र मन्त्रीको बीचको तनाब बढ्दै
अहिले श्रममन्त्री शरद सिंह भण्डारी र श्रम सचिव डा.कृष्णहरि पुष्कर बीचको सम्बन्ध चिसिएको छ । मन्त्री र सचिव बीचको सम्बन्धमा आएको दरारका कारण श्रम मन्त्रीले उपहार दिएको गाडी खोज्न सचिव पुष्करले गृह मन्त्रालयलाई पत्र पठाएका थिए ।
सचिव पुष्करकै निर्देशनमा प्रशासन शाखाले गत असार १५ गते गृह मन्त्रालयलाई पत्र लेख्दै मन्त्रालयको स्वामित्वमा रहेको महिन्द्रा स्कोर्पियो (प्रदेश ३–०१–००२ झ ५३६७) नम्बरको सरकारी गाडी हराएको निवेदन दिएका थिए । मन्त्रालयले गाडी केही दिन अघि देखि हराएको भन्दै नेपाल सरकारको सचिवस्तरी निर्णय अनुसार सावरी साधन जहाँ जस्तो जुन अवस्थामा छ खोज तलास गरिदिन भन्दै गृह मन्त्रालयलाई पत्राचार गरेको थियो । साथै प्रचलित कानून बमोजिम सो कार्यमा संलग्न रहेका व्यक्तिलाई मुद्दा दर्ता गरी, अनुसन्धान गरी कारवाही अगाडि बढाउन भनिएको छ ।
तर, काठमाडौं उपत्यका ट्राफिक प्रहरी कार्यालयका प्रवक्ता दीपक गिरीले मन्त्रालयले १५ गते गाडी हरायो भन्दै पत्र पठाएको भए पनि फेरी अर्को पत्र पठाउँदै गाडी फेला परेको जानकारी दिएको बताए ।
मन्त्रालयका प्रवक्ता डण्डुराज घिमिरेले भने ड्राइभरले गाडी मन्त्रालयमा आफै लिएर आएको बताए । गाडी कहाँ फेला प¥यो, कसले चोरेको रहेछ, कारवाही के हुन्छ भन्ने प्रश्नमा उनले भने ‘गाडी आयो, आएपछि हामीले यस विषयमा थप सोधखोज गरेनौ । गाडी पाई सकेपछि थप सोधखोज गर्नु नै परेन नी,’ उनले भने ।
सुरक्षामा प्रश्न : श्रम मन्त्रालयको गाडी सिंहदरबारबाट हरायो
