आर्थिकन्यूज
काठमाडौं। वैदेशिक अध्ययनका लागि परामर्श प्रदान गर्न खोलिएका शैक्षिक परामर्शदाताहरूले अधिकार क्षेत्र भन्दा बाहिर गएर हवाई टिकट विक्री गर्ने गरेको पाइएको छ । अध्ययन लागि अन्तिम प्रक्रियामा पुगेका विद्यार्थीलाई अनावश्यक डर, त्रास र धम्की देखाएर परामर्शदाताहरूले चर्को शुल्कमा हवाई टिकट विक्री गर्ने गरेको पाइएको छ ।
परामर्शदाताको मुख्य कार्य क्षेत्र भनेको विदेश अध्ययन सम्बन्धी परामर्श दिने, भाषा कक्षा सञ्चालन गर्ने, कागजात तयारी र भिसा प्रक्रियामा सहयोग गर्ने हो । तर, विद्यार्थीलाई ठग्ने नियतले परामर्शदाताहरूले हवाई टिकट विक्री गर्दै आएको पाइएको छ ।
२०२५ को सेटेम्बर इन्टेकमा दक्षिण कोरिया जाने भिसा प्राप्त गरेका करिब २५ जना विद्यार्थीहरूलाई बागबजार स्थित खुशी इन्टरनेशनल कन्सल्टेन्सीले जबरजस्ती हवाई टिकट खरिद गर्न लगाएको एक पीडित विद्यार्थीले बताए । भिसाको अन्तिम प्रक्रिया सकिएपछि परामर्शदाताले जबरजस्ती टिकट आफैसँग लिन लगाएको उनले गुनासो गरे ।
बजारमा ५० हजार रुपैयाँ पर्ने टिकटलाई खुशी इन्टरनेशनले ८५ हजार देखि ९० हजार रुपैयाँसम्ममा खरिद गर्न बाध्य पारेको पीडितहरू बताउँछन् । विद्यार्थी र अभिभावकले आफैले टिकट काट्छौ भन्दा पनि कन्सल्टेन्सीले कोरिया पुगेपछि केही भएमा जिम्मा नलिने भन्दै धम्की दिएको पीडितहरूले गुनासो गरे । यस्तै, टिकट विक्री गर्दा कानुन अनुसार दिनुपर्ने भ्याट विल समेत नदिएको पीडितहरूले बताए ।
नेपालको हवाई सेवा सञ्चालन तथा विक्री सम्बन्धी व्यवस्था अनुसार हवाई टिकट विक्री गर्न नेपाल सरकारको पर्यटन विभाग वा नेपाल नागरिक उड्डयन प्राधिकरणमा आधिकारिक ट्राभल एजेन्सीका रुपमा दर्ता हुनुपर्ने प्रावधान छ । शैक्षिक परामर्शदाता संस्था भने शिक्षा, विज्ञान तथा प्रविधि मन्त्रालयमा दर्ता भएर सञ्चालन गर्न सक्नेछन् । तर, यी संस्थाहरूले हवाई टिकट विक्री गर्ने अनुमति भने पाएका हुँदैनन् ।
यस्तै, उपभोक्ता संरक्षण ऐन २०७५ अनुसार बजार मूल्य भन्दा बढी मूल्य असुल्नु भनेको ठगी र उपभोक्ता अधिकार हननको अपराध हो । विल वा रसिद नदिने कार्य कानुनी विपरित हो । तर, परामर्शदाताहरूले ऐन विपरित आफ्नो अधिकार क्षेत्र भन्दा बाहिर हवाई टिकट विक्री गर्दै खुलेआम विद्यार्थीहरूलाई ठग्दै आएका छन् ।
भिसा पाएपछि विदेश जाने अन्तिम तयारीमा रहेका विद्यार्थीहरूलाई समयको दबाब र भविष्यको डर देखाएर अनावश्यक रकम असुलिएको पीडितहरुको गुनासो छ । परामर्शदाताको दबाबमा अभिभावकहरू ऋण लिएर भएपनि महँगो टिकट खरिद गर्न बाध्य भएका छन् ।
