आर्थिकन्यूज
क्यानबेरा । अष्ट्रेलियाको बेरोजगारी दर घटेर जुलाईमा ४.२ प्रतिशत कायम भएसँगै रोजगारीमा वृद्धि भएको जनाइएको छ । यहाँ रोजगारीमा संलग्न महिलाको सहभागिता दर उच्च रहेको उल्लेख गरिएको छ ।
‘अस्ट्रेलियन ब्युरो अफ स्ट्याटिस्टिक्स (एबीएस)’ ले बिहीबार सार्वजनिक गरेको तथ्याङ्कले जुलाईमा बेरोजगारी दर ४.२ प्रतिशत रहेको जनाएको छ । यो गत जुन महिनामा ४.३ प्रतिशत रहेको थियो।
एबीएसका अनुसार जुन र जुलाईको बिचमा कार्यरत अस्ट्रेलियालीहरूको सङ्ख्या २४ हजार ५०० र जुलाईसम्म १२ महिनामा दुई लाख ६३ हजार ७०० ले वृद्धि भएको छ ।
पूर्ण समय काम गर्ने अस्ट्रेलियालीहरूको सङ्ख्या जुनदेखि जुलाईसम्म ६० हजार ५०० ले वृद्धि भएको जनाइएको छ । जुन आंशिक समयका आधारमा कार्यरत व्यक्तिहरूको सङ्ख्यामा ३५ हजार ९०० को गिरावट हो ।
पूर्ण समय काम गर्ने महिलाहरु जुलाईको बीचमा ४० हजारले वृद्धि भएको, एबीएसले जनाएको छ। महिला रोजगार-जनसङ्ख्या अनुपात र सहभागिता दर क्रमशः ६०.९ प्रतिशत र ६३.५ प्रतिशतको नयाँ रेकर्ड पुगेको जनाइएको छ ।
अष्ट्रेलियालीहरूले जुन महिनाको तुलनामा जुलाई महिनामा ०.३ प्रतिशतले बढी काम गरेको देखिएको छ । अष्ट्रेलियाको केन्द्रीय रिजर्भ बैङ्क मङ्गलबार जारी गरिएको अद्यावधिक पूर्वानुमानमा बेरोजगारी दर सन् २०२६ र २०२७ मा ४.३ प्रतिशतमा स्थिर हुने अपेक्षा गरेको छ । सिन्ह्वा
