आर्थिकन्यूज
काठमाडौं । गत आर्थिक वर्ष २०८१/०८२ मा निर्जीवन बीमा कम्पनीहरुको खुद नाफा खुम्चिएको छ । अघिल्लो आर्थिक वर्ष २०८०/०८१ को तुलनामा ३०.८८ प्रतिशतले नाफा गिरावट भएको कम्पनीहरुले सार्वजनिक गरेको विवरणमा उल्लेख छ ।
अघिल्लो वर्ष कम्पनीहरुले ६ अर्ब १ करोड ७८ लाख रुपैयाँ खुद नाफा आर्जन गरेका थिए । गत वर्षमा मात्र ४ अर्ब १५ करोड १५ लाख रुपैयाँ मात्र नाफा आर्जन गरेका छन् ।
सञ्चालनमा रहेका १४ जिर्नीवन बीम कम्पनीमध्ये ८ वटाको नाफा घटेको छ, जसमध्ये एक कम्पनीले घाटा ब्योहोरेको छ । ६ कम्पनीको भने नाफा वृद्धि भएको छ । धेरै नाफा वृद्धि गर्नेमा प्रभु इन्स्योरेन्स पहिलो नम्बरमा छ भने धेरै नाफा कमाउनेमा सिद्धार्थ प्रिमियर इन्स्योरेन्स अगाडी छ ।
प्रभुको नाफा ३९.२२ प्रतिशतले वृद्धि हुँदा सानिमा जीआईसी इन्स्योरेन्सको नाफा १०.१२ प्रतिशत, एनएलजी इन्स्योरेन्सको ९.६७ प्रतिशत, नेपाल इन्स्योरेन्सको नाफा ४.१८, सिद्धार्थ प्रिमियरको नाफा ३.६३ र शिखर इन्स्योरेन्सको नाफा १.६६ प्रतिशतले वृद्धि भएको छ ।
सिद्धार्थ प्रिमियरले सबैभन्दा धेरै ७१ करोड ३१ लाख रुपैयाँ नाफा आर्जन गर्दा नेको इन्स्योरेन्सले ५५ करोड ८ लाख र हिमालयन एभरेष्ट इन्स्योरेन्सले ५३ करोड २३ लाख रुपैयाँ नाफा आर्जन गरेको छ ।
नेशनल इन्स्योरेन्सले ६२ करोड ३९ लाख रुपैयाँ घाटा ब्योहोरेको छ । द ओरियन्टल इन्स्योरेन्सको नाफा ८६ प्रतिशत, राष्ट्रिय बीमा कम्पनीको ३१.८३, आईजीआई प्रुडेन्सियलको २७.८४, हिमालयन एभेरेष्ट इन्स्योरेन्सको २०.३०, यूनाइटेड अजोड इन्स्योरेन्सको २१.८८, सगरमाथा लुम्बिनी इन्स्योरेन्सको १२.५२ र नेको इन्स्योरेन्सको नाफा ६.२७ प्रतिशतले घटेको छ ।
किन घट्यो नाफा ?
गत वर्ष असोज १० गते आएको बाढी पहिरो कारण निर्जीवन बीमा कम्पनीहरुको नाफामा प्रभाव परेको हो । सो बाढीबाट निर्जीवन बीमा कम्पनीहरुमा १२ अर्ब २७ करोड रुपैयाँ बढीको दाबी पेश भएको थियो ।
जसमा कम्पनीहरुले ४ अर्ब ८७ करोड रुपैयाँ दाबी भुक्तानी गरेका थिए । यसरी ठुलो रकम भुक्तानी गर्नुपर्दा कम्पनीहरुको नाफामा असर परेको सानिमा जीआईसी इन्स्योरेन्सका प्रमुख कार्याकारी अधिकृत सुद्युम्न प्रसाद उपाध्याय बताउँछन् ।
यसका साथै बैंकको ब्याजदरमा आएको गिरावटले पनि कम्पनीहरुको नाफामा असर गरेको उनको भनाई छ । उनले भने, 'बीमा कम्पनीहरुको मुख्य लगानी बैंकको मुद्दती निक्षेपमा रहेको छ । बैंकको ब्याजदर घटेको घटै छ । जसले गर्दा नाफा घट्न पुग्यो ।’
निर्जीवन कम्पनीहरुको नाफा उल्लेख्य मात्रामा घटिरहेको बेला सानिमा जीआईसीको नाफा बढ्नुको कारण के हो भन्ने प्रश्नमा उनको जवाफ, 'हाम्रो पुनर्बीमा प्रोटेक्सन राम्रो थियो ।’
