आर्थिकन्यूज
काठमाडौं । नेपालमा सञ्चालित पुनर्बीमा कम्पनीहरूको लगानी नागरिक लगानी कोष, म्युचुअल फण्ड र सूचीकृत पब्लिक कम्पनीको साधारण शेयरमा डाइभर्ट भएको छ । नेपाल बीमा प्राधिकरणले प्रकाशित गरेको गत आर्थिक वर्ष २०८१/८२ को वित्तीय विवरण अनुसार नागरिक लगानी कोष, म्युचुअल फण्डमा पुनर्बीमा कम्पनीको लगानी आठ गुणाले बढेको छ भने सूचीकृत पब्लिक कम्पनीको साधारण शेयरमा चार गुणा भन्दा धेरैले बढेको छ ।
गत आवमा नागरिक लगानी कोष र म्युचुअल फण्डमा पुनर्बीमा कम्पनीले ७२ करोड ९ लाख रुपैयाँ लगानी गरेको तथ्यांकमा उल्लेख छ । अघिल्लो आवको सोही अवधिमा भने कम्पनीहरूले सो क्षेत्रमा नौ करोड नौ लाख रुपैयाँ लगानी गरेका थिए ।
सूचीकृत पब्लिक कम्पनीको साधारण शेयरमा गत आव कम्पनीहरूले पाँच अर्ब २८ करोड रुपैयाँ लगानी गरेका छन् भने अघिल्लो आवको सोही अवधिमा एक अर्ब १७ करोड रुपैयाँ लगानी गरेको तथ्यांक छ ।
यस्तै, वित्त कम्पनीको मुद्दती निक्षेपमा कम्पनीहरूको लगानी ४० करोड रुपैयाँ पुगेको छ । यो रकम अघिल्लो आवको सोही अवधिको तुलनामा चार गुणाले बढी हो । अघिल्लो आवको सोही अवधिमा वित्त कम्पनीको मुद्दती निक्षेपमा कम्पनीहरूले १० करोड रुपैयाँ लगानी गरेका थिए ।
तर, नेपाल सरकार, प्रदेश सरकार र स्थानीय सरकार वा नेपाल राष्ट्र बैंकले जारी गरेको वण्ड, डिवेन्चर र ऋणपत्रमा भने पुनर्बीमा कम्पनीले लगानी घटाएका छन् । प्राधिकरणको तथ्यांक अनुसार हिमालयन रि इन्स्योरेन्स कम्पनीले सो क्षेत्रमा लगानी नै गरेको छैन । नेपाल पुनर्बीमा कम्पनीले भने अघिल्लो आवमा ३० करोड रुपैयाँ लगानी गरेको थियो । अहिले भने लगानी गरेको छैन । यो क्षेत्रमा कम्पनीहरूले न्यूनतम् २० प्रतिशत लगानी गर्नुपर्ने प्राधिकरणको प्रावधान छ ।
बाणिज्य र पूर्वाधार बैंकको मुद्दती निक्षेपमा पनि बैंकहरुको लगानी घटेको छ । गत आवका यो क्षेत्रमा कम्पनीहरूले २७ अर्ब २३ करोड ४४ लाख रुपैयाँ लगानी गरेका थिए । यो रकम अघिल्लो आवको सोही अवधिको तुलनामा ६.५३ प्रतिशतले कम हो । अघिल्लो आवको सोही अवधिमा भने कम्पनीहरूले सो क्षेत्रमा २९ अर्ब १३ लाख ८३ करोड रुपैयाँ लगानी गरेका थिए । यो क्षेत्रमा कम्पनीहरूले आफ्नो कुल लगानीको कम्तीमा ३० प्रतिशत रकम लगानी गर्न पाउने व्यवस्था छ ।
विकास बैंकको मुद्दती निक्षेपमा गरिएको लगानी पनि घटेको छ । कम्पनीहरूले गत आवमा एक अर्ब ८६ रुपैयाँ लगानी गरेका छन् । अघिल्लो आवको तुलनामा यो रकम ७.८१ प्रतिशतले कम हो । अघिल्लो आवको सोही अवधिमा भने कम्पनीहरूले दुई अर्ब एक करोड रुपैयाँ लगानी गरेका थिए । यो क्षेत्रमा कम्पनीहरूले आफ्नो कुल लगानीको बढीमा १० प्रतिशतसम्म लगानी गर्न पाउने व्यवस्था छ ।
गत आवमा कम्पनीहरूले वित्तीय संस्थाको वण्ड डिवेन्चरमा दुई अर्ब ९३ करोड ३५ लाख रुपैयाँ लगानी गरेका छन् । यो रकम अघिल्लो आवको सोही अवधिको तुलनामा १८.४७ प्रतिशतले कम हो । अघिल्लो आवको सोही अवधिमा भने सो क्षेत्रमा कम्पनीहरूले तीन अर्ब पाँच करोड रुपैयाँ लगानी गरेका थिए । यो क्षेत्रमा कम्पनीहरूले आफ्नो कुल लगानीको बढीमा २० प्रतिशत लगानी गर्न पाउँछन् ।
इन्भेष्टमेन्ट कम्पनीमा भने गत आवमा कम्पनीहरूले एक अर्ब पाँच करोड रुपैयाँ लगानी गरेका छन् । यो रकम अघिल्लो आवको सोही अवधिको तुलनामा १६.६७ प्रतिशतले बढी हो । अघिल्लो आवको सोही अवधिमा भने यस्तो क्षेत्रमा कम्पनीहरूको लगानी ९० करोड रुपैयाँ थियो । अन्य क्षेत्रमा भने कम्पनीहरूको दुई गुणा भन्दा धेरैले बढेको छ ।
तर, घरजग्गा, सूचीकृत पब्लिक कम्पनीको वण्ड, डिवेन्चर र उत्पादन क्षेत्रमा कम्पनीहरूले कुनै लगानी गरेका छैनन् ।
नेपाल पुनर्बीमा कम्पनीको लगानी घट्यो
गत वर्षमा नेपाल पुनर्बीमा कम्पनीको लगानी घटेको छ । नेपाल बीमा प्राधिकरणको तथ्यांक अनुसार गत आवमा कम्पनीहरूले विभिन्न क्षेत्रमा २० अर्ब ७२ करोड ४८ लाख रुपैयाँ लगानी गरेको छ । अघिल्लो आवको सोही अवधिमा भने कम्पनीले २० अर्ब ७८ करोड ७० लाख रुपैयाँ लगानी गरेको थियो ।
कम्पनीको लगानी वित्त कम्पनीको मुद्दती निक्षेपमा चार गुणाले बढेको छ भने नागरिक लगानी कोष र म्युअुचल फण्डमा दुई गुणा भन्दा धेरैले लगानी बढेको छ । अन्य क्षेत्रमा भने लगानी घटेको छ ।
कम्पनीले बाणिज्य बैक र पूर्वाधार विकास बैंकको मुद्दती निक्षेपमा १५ अर्ब ८ करोड ४० लाख रुपैयाँ लगानी गरेको छ । यो रकम अघिल्लो आवको तुलनामा तीन प्रतिशतले कम हो । अघिल्लो आवको सोही अवधिमा कम्पनीले सो क्षेत्रमा १५ अर्ब ५४ करोड ३१ लाख रुपैयाँ लगानी गरेको थियो ।
विकास बैंकको मुद्दती निक्षेपमा कम्पनीले एक अर्ब ८६ करोड रुपैयाँ लगानी गरेको छ । यो रकम अघिल्लो आवको सोही अवधिको तुलनामा ०.४ प्रतिशतले कम हो । अघिल्लो आवको सोही अवधिमा सो क्षेत्रमा कम्पनीले एक अर्ब ८६ करोड ७६ लाख रुपैयाँ लगानी गरेको थियो ।
फाइनान्स कम्पनीको मुद्दती निक्षेपमा भने कम्पनीले ४० करोड रुपैयाँ लगानी गरेको छ । यो रकम अघिल्लो आवको सोही अवधिको तुलनामा चार गुणाले बढी हो । अघिल्लो आवको सोही अवधिमा यो क्षेत्रमा कम्पनीले १० करोड रुपैयाँ लगानी गरेको थियो ।
सूचीकृत पब्लिक कम्पनीको साधारण शेयरमा भने कम्पनीले नौ करोड ४७ लाख रुपैयाँ लगानी गरेको छ । वित्तीय संस्थाको वण्ड डिवेन्चरमा एक अर्ब १४ करोड १३ लाख, नागरिक लगानी कोष र म्युचुअल फण्डमा १२ करोड ९ लाख, अन्य संस्थापक शेयरमा ५९ करोड ६५ लाख, सूचीकृत नभएको पब्लिक कम्पनीको शेयरमा ५० करोड ७२ लाख र अन्य क्षेत्रमा ६५ करोड रुपैयाँ लगानी गरेको छ ।
गत वर्ष हिमालयन रि को लगानी १४ प्रतिशतले बढ्यो
गत वर्ष हिमालयन रि इन्स्योरेन्स कम्पनीको लगानी १४.२० प्रतिशतले वृद्धि भएको छ । गत आवमा कम्पनीले विभिन्न क्षेत्रमा २० अर्ब ३० करोड १६ लाख रुपैयाँ लगानी गरेको छ । अघिल्लो आवको सोही अवधिमा कम्पनीले १७ अर्ब ७७ करोड ७८ लाख रुपैयाँ लगानी गरेको थियो ।
कम्पनीले नागरिक लगानी कोष र म्युचुअल फण्डमा १५ गुणाले लगानी बढाएको छ भने सूचीकृत पब्लिक कम्पनीको साधारण शेयरमा करिब पाँच गुणाले लगानी बढाएको छ । तर, बैक तथा वित्तीय संस्थाहरूको मुद्दती निक्षेपमा भएको लगानी घटाएको छ ।
कम्पनीले गत आवमा बाणिज्य बैंक र पूर्वाधार क्षेत्रमा १२ अर्ब १५ करोड ३१ लाख रुपैयाँ लगानी गरेको छ । यो रकम अघिल्लो आवको सोही अवधिको तुलनामा १०.६३ प्रतिशतले कम हो । अघिल्लो आवको सोही अवधिमा कम्पनीहरूले १३ अर्ब ५९ करोड ५१ लाख रुपैयाँ लगानी भएको थियो ।
विकास बैंकको मुद्धती निक्षेपमा भने कम्पनीले कुनै पनि लगानी गरेको छैन । अघिल्लो आवको सोही अवधिमा भने कम्पनीले १५ करोड रुपैयाँ लगानी गरेको थियो ।
सूचीकृत पब्लिक कम्पनीको शेयरमा कम्पनीले गत आवमा पाँच अर्ब १८ करोड ९३ लाख रुपैयाँ लगानी गरेको छ । अघिल्लो आवको तुलनामा यो रकम करिब पाँच गुणाले बढी हो । अघिल्लो आवको सोही अवधिमा कम्पनीले एक अर्ब आठ करोड सात लाख रुपैयाँ लगानी गरेको थियो ।
गत आव वित्तीय संस्थाको वण्ड डिवेन्चरमा कम्पनीले एक अर्ब ८२ करोड २१ लाख रुपैयाँ लगानी गरेको छ । यो रकम अघिल्लो आवको सोही अवधिको तुलनामा १८.७७ प्रतिशतले कम हो । अघिल्लो आवको सोही अवधिमा कम्पनीले एक अर्ब ३३ करोड २१ लाख रुपैयाँ लगानी गरेको थियो ।
नागरिक लगानी कोष र म्युुचुअल फण्डमा ६० करोड लगानी गरेको छ भने इन्भेष्टमेन्ट कम्पनीमा एक अर्ब पाँच करोड लगानी गरेको छ । यस्तै, कम्पनीले अन्य संस्थापक शेयरमा २२ करोड ५० लाख र अन्य क्षेत्रमा ४७ लाख रुपैयाँ लगानी गरेको छ ।
