आर्थिकन्यूज
वीरगञ्ज । वीरगञ्ज स्थित ठाकुरराम बहुमुखी क्याम्पसमा शनिबार भएको परीक्षामा ठूलो अनियमितता पर्दाफास भएको छ । मानविकी संकायअन्तर्गत राजनीति शास्त्र स्नातकोत्तर तह (एम.ए) तेस्रो सेमेस्टरको परीक्षा चलिरहेका बेला नक्कली परीक्षार्थीको रूपमा परीक्षा दिइरहेका एक युवक पक्राउ परेका छन् ।
पक्राउ पर्ने युवक २५ वर्षीय महमद अफताब , नेपाली कांग्रेस पर्साका क्षेत्रीय सभापति महमद साहबुद्धिनका छोरा रहेका छन ।क्याम्पस प्रमुख मोहन यादवका अनुसार, सिम्बोल नम्बर १५२७०२३ का वास्तविक परीक्षार्थी महमद साहबुद्धिन थिए । तर परीक्षा कक्षमा भने उनका छोरा अफताब बुवाकै नाममा, आप्नो फोटो टाँसी प्रवेशपत्र प्रयोग गरेर परीक्षा दिइरहेको अवस्थामा फेला परेका हुन ।
नकली परिक्षा परिक्षा दिरहेको सूचना पाएपछि क्याम्पस प्रशासनले तत्काल अनुगमन टोली खटायो। जाँच गर्दा परीक्षार्थी साहबुद्धिनको स्थानमा उनका छोरा परीक्षा दिइरहेको पुष्टि भएपछि उनलाई परीक्षा हलमै नियन्त्रणमा लिइएको क्याम्पस प्रमुख यादवले बताए।
घटनापछि अफताबलाई क्याम्पस प्रशासनले प्रहरीलाई जिम्मा लगाएको छ । हाल उनलाई वडा प्रहरी कार्यालय वीर्तामा राखिएको छ । क्याम्पस प्रशासनका अनुसार, त्रिभुवन विश्वविद्यालयको “संगठन तथा शैक्षिक प्रशासनसम्बन्धी नियम २०५०” को दफा २७० (क) बमोजिम कानुनी कारबाही अघि बढाइनेछ । यस प्रावधान अनुसार परीक्षामा नक्कली परीक्षार्थी पठाउने वा अरूको सट्टा परीक्षा दिने दुवैलाई कारबाही हुने व्यवस्था छ ।
यसर्थ, पक्राउ परेका अफताब मात्र नभई उनका पिता साहबुद्धिनमाथि समेत कारबाही प्रक्रिया अघि बढाइएको क्याम्पसले जनाएको छ। पर्सा प्रहरी प्रमुख एसपी गौतम मिश्रले घटनाको पुष्टि गर्दै भने, “क्याम्पस प्रशासनबाट बुझाइएको युवकलाई थप अनुसन्धानका लागि नियन्त्रणमा लिइएको छ । यस विषयमा आवश्यक कानुनी कदम चालिनेछ ।”
प्रहरीका अनुसार, यो प्रकरण केवल शैक्षिक अनुशासन तोड्ने मामिला मात्र नभई नियम–कानूनविपरीत कार्य भएकाले विस्तृत अनुसन्धानपछि मुद्दा दायर गरिनेछ ।
यस घटनाले क्याम्पस र विश्वविद्यालय दुवैको शैक्षिक विश्वसनीयता माथि गम्भीर प्रश्न उठाएको छ । विद्यार्थी संगठन र सरोकारवालाले यसलाई शैक्षिक अनियमितताको ठूलो उदाहरण भन्दै कारबाही कडाइका साथ कार्यान्वयन गर्नुपर्ने माग गरेका छन् ।
शैक्षिक विज्ञहरूका अनुसार, “शिक्षण संस्थामा नक्कली परीक्षार्थी पठाउने प्रवृत्ति प्रोत्साहन पायो भने विश्वविद्यालयको स्तर नै कमजोर हुन्छ। यसकारण यसलाई तुरुन्तै नियन्त्रणमा लिनुपर्ने” धारणा छ ।
वीरगञ्जको ठाकुरराम क्याम्पसमा भएको यो घटना केवल एक व्यक्तिको गल्ती मात्र नभई शिक्षा क्षेत्रमा बढ्दो बेइमानी र मूल्यहीनताको प्रतिबिम्ब हो । अब कानुनी कारबाही कस्तो हुन्छ भन्नेमा सबैको ध्यान केन्द्रीत भएको छ ।
