आर्थिकन्यूज
काठमाडौँ । सर्वोच्च अदालतले अर्थमन्त्री रामेश्वर खनालविरुद्ध नेपाल बीमा प्राधिकरणका बर्खास्त अध्यक्ष शरद ओझाले दायर गरेको अदालतको अवहेलना मुद्दा दर्ता गर्न आदेश दिएको छ।
न्यायाधीश अब्दुल अजिज मुसलमान र मेघराज पोख्रेलको इजलासले आइतबार उक्त रिट दर्ता गर्न सर्वोच्च प्रशासनलाई निर्देशन दिएको हो। यसअघि सोही रिटलाई अदालत प्रशासनले दरपीठ (दर्ता नगरी फिर्ता) गरेको थियो।
ओझालाई प्राधिकरणको अध्यक्ष पदबाट हटाउने सरकारको निर्णयविरुद्ध उनले सर्वोच्चमा रिट दायर गरेका थिए। त्यसमा सर्वोच्चले उनको पक्षमा अन्तरिम आदेश जारी गर्दै पदमा बहाल रहन पाउने व्यवस्था मिलाएको थियो।
अन्तरिम आदेशपछि प्राधिकरणमा हाजिरी हुन पुगेका ओझालाई सरकारले काम गर्न नदिएपछि उनले अर्थमन्त्री खनालले सर्वोच्चको आदेशको अवज्ञा गरेको भन्दै पुनः अदालतको अवहेलना मुद्दा दायर गरेका थिए। सर्वोच्चले दरपीठ भएको सोही मुद्दालाई अब दर्ता गर्न आदेश दिएको हो।
