आर्थिकन्यूज
काठमाडौं । सन् २०२४ मा धनी तथा उदाउँदो अर्थतन्त्र भएका देशमा कामका लागि जाने आप्रवासीको संख्या सन् २०२३ को तुलनामा २१ प्रतिशतले घटेको देखिएको छ। यो तथ्य आर्थिक सहकार्य र विकास संगठन (ओइसिडी) को पछिल्लो प्रतिवेदनमा उल्लेख गरिएको छ।
प्रतिवेदनअनुसार सन् २०२३ मा करिब ६५ लाख मानिस ओइसिडीका देशमा आएका थिए। बेलायत, क्यानडा, फ्रान्स र जापान जस्ता देशमा बसाइँ सर्नेको संख्या नयाँ किर्तिमान बनाएको थियो। तर सन् २०२४ मा कामदार आप्रवासनमा उल्लेख्य गिरावट आएको छ।
कामदार आप्रवासन घट्नुमा श्रम बजार कमजोर हुनु, अस्ट्रेलिया र बेलायतले भिसा नियम कडा गर्नु र युरोपमा युक्रेनी शरणार्थीको बढ्दो उपस्थितिले प्रभाव पारेको प्रतिवेदनमा उल्लेख छ। यसकारण ओइसिडीका सदस्य राष्ट्रमा स्थायी रूपमा काम गर्नेको संख्या करिब ९ लाख ३४ हजारमा झरेको छ।
त्यस्तै, अन्तर्राष्ट्रिय विद्यार्थी आप्रवासनमा पनि कमी आएको छ। सन् २०२३ देखि २०२४ भित्र नयाँ विद्यार्थीको संख्या १३ प्रतिशतले घटेको प्रतिवेदनले जनाएको छ।
तर मानवीय कारणले बसाइँ सर्नेहरूको संख्या बढेको छ। अमेरिकामा शरणार्थी भिसामा आवेदन दिनेहरूको संख्या वृद्धि भएको छ भने बेलायतमा अन्य युरोपेली देशबाट डुंगाबाट आउने अवैध आप्रवासीको संख्या पनि बढेको देखिएको छ।
नतिजा स्वरूप, कामदार र विद्यार्थी आप्रवासनमा गिरावट आए पनि मानवीय कारणले आश्रय खोज्नेहरूको वृद्धि भएकोले कुल आप्रवासनमा सन् २०२३ को तुलनामा केवल ४ प्रतिशतको मामुली कमी आएको छ।
प्रतिवेदनमा उल्लेख छ कि आप्रवासनले नयाँ रोजगारीका अवसर सिर्जना गर्ने भूमिका पनि खेलिरहेको छ र नीति तथा भिसा नियम परिवर्तनले आप्रवासी प्रवाहमा प्रत्यक्ष प्रभाव पारिरहेको छ।
