आर्थिकन्यूज
काठमाडौं । गत साताको आइतबार अर्थात मंसिर १४ गतेदेखि निरन्तर ओरालो लागेको नेप्सेको सातौं दिनमा थामिएको छ।अघिल्लो आइतबारदेखि निरन्तर घटेको नेप्से ६ कारोबार दिनमा झण्डै ७० अंक ओरालो लागेको थियो । मंगलबार भने सवा ७ अंकले सुधारिएको छ।
मंगलबार नेप्से परिसूचक ७.३९ अंक बढेर २६१४.०७ विन्दुमा पुगेको छ । नेप्से बढेपनि यस दिन कारोबार रकम भने घटेको छ । अघिल्लो कारोबार दिन अर्थात सोमबार ४ अर्ब ६६ करोड रुपैयाँबराबरको शेयर खरिदबिक्री भएको बजार मंगलबार ३ अर्ब ७५ करोड ५० लाख २७ हजार रुपैयाँबराबरको शेयर खरिदबिक्री भएको छ।
१३ उपसमूहमध्ये यस दिन ९ उपसमूहको परिसूचक बढेको छ भने ४ उपसमूहको परिसूचक घटेको छ। यस दिन विकास बैंक, वित्त, होटल तथा पर्यटन, जलविद्युत, लगानी, जीवन बीमा, उत्पादन तथा प्रशोधन, म्युचुअल फण्ड र अन्य उपसमूहको परिसूचक सामान्य बढेको हो।
यस दिन तीन स्टकको शेयर सकारात्मक सर्किट लेभलमा कारोबार भएको छ। यस दिन स्वस्तिक लघुवित्त वित्तीय संस्था, श्रीनगर एग्रीटेक इन्डष्ट्रीज र माथिल्लो मैलुङ्ग खोला जलविद्युतको शेयर सकारात्मक सर्किट लेभलमा कारोबार भएको हो। आजको बजारमा मूल्य घटेका स्टकहरुको गिरावटदर ४ प्रतिशतभन्दा कम रहेको छ।
कारोबार रकमका आधारमा यस दिन ङादी ग्रुप पावर शीर्ष स्थानमा रहेको छ। सो कम्पनीको यस दिन ३१ करोड ९२ लाख रुपैयाँबराबरको शेयर कारोबार भएको छ। त्यस्तै, यस दिन लक्ष्मी सनराइज बैंकको ११ करोडभन्दा बढीको शेयर किनबेच भएको छ भने राधी विद्युत कम्पनीको करिब १० करोड रुपैयाँको शेयर खरिदबिक्री भएको छ।
