आर्थिकन्यूज
इटहरी । पूर्वी नेपालको पहिलो अन्तर्राष्ट्रिय पाँचतारे होटल रमाडा बाइ विन्डहम इटहरी र धरान गल्फ कोर्स संघबीच रणनीतिक आतिथ्य साझेदारी घोषणा गरिएको छ।
होटलको भव्य उद्घाटन पूर्वसन्ध्यामा सम्पन्न उक्त सहकार्यले प्रिमियम मनोरञ्जन, खेल पर्यटन तथा उच्चस्तरीय आतिथ्य सेवाको विकासमा नयाँ सम्भावना सिर्जना गर्ने विश्वास लिइएको छ।
साझेदारीअन्तर्गत धरान गल्फ कोर्स संघका देशभरका विशिष्ट सदस्य तथा गल्फ खेलाडीहरूले रमाडा बाइ विन्डहम इटहरीका अन्तर्राष्ट्रिय मापदण्डअनुसारका सेवा–सुविधा होटल सञ्चालनपूर्व नै अनुभव गर्ने अवसर पाउनेछन्। यस पहलले गल्फ पर्यटनको बढ्दो संस्कृतिलाई स्तरीय आतिथ्य सेवासँग जोड्दै पूर्वी नेपाललाई उच्च मूल्यका आन्तरिक तथा अन्तर्राष्ट्रिय पर्यटकका लागि आकर्षक गन्तव्यका रूपमा स्थापित गर्ने लक्ष्य लिएको छ।
यस अवसरमा रमाडा बाइ विन्डहम इटहरीका महाप्रबन्धक अभिमन्यु कायस्थले भने, “धरान गल्फ कोर्स संघसँगको यो साझेदारी हाम्रो दीर्घकालीन दृष्टिकोणको महत्वपूर्ण हिस्सा हो। यसमार्फत हामी गन्तव्यको समग्र आकर्षण वृद्धि गर्दै विश्वस्तरीय आतिथ्य सेवा र स्थानीय सान्दर्भिकतालाई एकीकृत गर्न चाहन्छौं।”
महेंद्र राजमार्ग र कोशी राजमार्गको संगमस्थलमा अवस्थित रमाडा बाइ विन्डहम इटहरी विराटनगर विमानस्थलबाट करिब २१ किलोमिटर दूरीमा रहेको छ। होटलमा ८१ आधुनिक कोठा तथा सुइट, स्वीमिङ पुल, वेलनेस सुविधा तथा NUA – अल डे डाइनिङ, सत्रा लाउन्ज, ARIA – पुलसाइड डाइनिङ र छतमा अवस्थित सामाजिक केन्द्र शुक्रा बारलगायत विशेष भोजन तथा मनोरञ्जन स्थलहरू रहनेछन्।
विश्वकै ठूला होटल समूहहरूमध्ये एक विन्डहम होटल्स एन्ड रिसोर्ट्स अन्तर्गत सञ्चालनमा आउन लागेको रमाडा बाइ विन्डहम इटहरीले रणनीतिक साझेदारी, सेवा उत्कृष्टता र अन्तर्राष्ट्रिय मापदण्डमार्फत पूर्वी नेपालमा लक्जरी आतिथ्य र गन्तव्य-आधारित पर्यटनको भविष्य निर्धारण गर्ने अपेक्षा गरिएको छ।
