आर्थिकन्यूज
काठमाडौं । राष्ट्रिय गौरवको आयोजना काठमाडौं–तराई-मधेश द्रुतमार्गमा चालु आर्थिक वर्ष ०८२/८३ को पहिलो ६ महिनामा मात्रै ३.०३ प्रतिशत काम भएको देखिएको छ। नेपाली सेनाले सार्वजनिक गरेको प्रगति विवरणअनुसार साउनदेखि पुस मसान्तसम्म परियोजनामा न्यून प्रगति भएको हाे।
गत असारसम्म परियोजनाको समग्र भौतिक प्रगति ४२.१३ प्रतिशत थियो। चालु आवको पुस मसान्तसम्म आइपुग्दा भौतिक प्रगति ३.०३ प्रतिशत विन्दुले बढेर ४५.१६ प्रतिशत पुगेको छ। परियोजनाको वित्तीय प्रगति भने ४५.३३ प्रतिशत रहेको छ। हालसम्म ८२ अर्ब ९७ करोड रूपैयाँ खर्च भइसकेको छ।
सडक निर्माणको जिम्मेवारी २१ बैशाख ०७४ मा नेपाली सेनालाई दिइएको थियो। १ भदौ ०७६ मा विस्तृत परियोजना प्रतिवेदन (डिपिआर) स्वीकृत भएदेखि औपचारिक रूपमा निर्माण सुरु भएको थियो। आठ वर्षमा ४५.१६ प्रतिशत मात्रै काम भएकोले प्रगति सुस्त देखिएको छ।
द्रुतमार्ग अन्तर्गत सात सुरुङ मार्ग निर्माण हुँदैछ। धेद्रेमा रहेको १७२८ मिटर लामो वायाँ सुरुङ र १६५३ मिटर दायाँ सुरुङ ब्रेकथ्रु भइसकेको छ। लेनडाँडामा १६३३ मिटर वायाँ र १६१२ मिटर दायाँ सुरुङमा ब्रेकथ्रु भइसकेको छ। हाल महादेवटार र चन्द्राम भिरमा सुरुङ निर्माणको काम जारी छ। महादेवटारमा ३४८६ मिटर वायाँ सुरुङमा २५३९ मिटर र ३४२२ मिटर दायाँ सुरुङमा २१४८ मिटर खनिएको छ। चन्द्राम भिरमा २२१३ मिटर वायाँ र २२६१ मिटर दायाँ सुरुङमा क्रमशः ३७४ र २८७ मिटर खनिएको छ। देवीचौर, सिसौटार र मौरीभिर खण्डमा ट्र्याक खोल्ने कार्य भइरहेको छ, जसको लम्बाइ क्रमशः १ किमी, ०.३९० किमी र ०.५९४ किमी छ।
ललितपुरको खोकनाबाट सुरु हुने सडक बारासम्म जानेछ। तर, खोकनामा जग्गा प्राप्ति हुन नसक्दा निर्माण सुरु हुन सकेको छैन। स्थानीयले प्रस्थानविन्दु परिवर्तनको माग गर्दै आएका छन्। यस क्षेत्रमा अझै ठोस निर्णय नलिनुका कारण काम सुस्त छ।
कुल मिलाएर, चालु आवमा द्रुतमार्गमा न्यून प्रगति देखिँदा राष्ट्रिय गौरवको योजनामा ढिलाइको चिन्ता बढेको छ। सुरुङ निर्माण केही खण्डमा गति पाइरहेको भए पनि प्रस्थानविन्दु विवाद र जग्गा समस्या परियोजनाको समयमै सम्पन्न हुने संभावना कम गराइरहेको छ।
