आर्थिकन्यूज
काठमाडौं। नेपाल र इजरायलबीच कृषि क्षेत्र र घरेलु केयरगिभरका लागि नेपाली कामदार पठाउने सम्झौताको प्रक्रिया अघि बढिरहेको छ। इजरायलले नेपालबाट पठाइने सम्झौता प्रस्ताव सकारात्मक रूपमा लिएर थप छलफलका लागि पत्राचार गरेको छ।
नेपाल सरकारले कृषि क्षेत्रका कामदार र वृद्धवृद्धा तथा अशक्तको स्याहार गर्ने घरेलु केयरगिभरका लागि पाँच वर्षसम्म दीर्घकालीन रोजगारी प्रदान गर्ने कार्यक्रम अन्तर्गत प्रस्ताव तयार पारेको थियो। हाल इजरायलमा संस्थागत केयर सेन्टरमार्फत बालबालिका, वृद्ध–वृद्धाको स्याहारका लागि नेपाली कामदार कार्यरत छन्। नयाँ सम्झौताअनुसार घरेलु केयरगिभर र कृषि कामदार समेत पठाउने तयारी भइरहेको छ।
इजरायलमा हाल करिब ५ हजार नेपाली श्रमिक कार्यरत छन्। पछिल्लो समय करिब २ हजार ५ सय भन्दा बढी नेपाली केयरगिभरको रूपमा काम गर्दै आएका छन्। इजरायलमा विदेशी श्रमिकको अभाव बढेसँगै नेपाली केयरगिभर र कृषि कामदारको माग उच्च भएको छ। सम्झौतापछि पठाइने कामदारको संख्या इजरायल सरकारको आवश्यकतानुसार निर्धारण हुने जनाइएको छ।
नेपाल र इजरायलबीच वार्षिक रूपमा नेपाली श्रमिकको माग बढाउँदै आएको र नयाँ केयर सेन्टर तथा घरेलु क्षेत्रमा रोजगारी दिने तयारी भइरहेको छ। यसअघि ‘लर्न एन्ड अर्न’ कार्यक्रम अन्तर्गत नेपाली विद्यार्थीहरूले कृषि फर्ममा ११ महिने इन्टर्नसिप रोजगारी गरेका थिए।
अघिल्ला वर्षमा इजरायलमा कृषि कामदार पठाउने प्रयास असफल भए पनि हालको तयारीले कृषि तथा घरेलु कामदार पठाउने लक्ष्यलाई पुनः गति दिएको छ। सम्झौताको प्राविधिक छलफलपछि मात्र अन्तिम टुंगो हुने र कामदार पठाउने कार्यक्रम लागू हुने अपेक्षा गरिएको छ।
