आर्थिकन्यूज
काठमाडौं । साताको पहिलो कारोबार दिन सोमबार सेयर बजारमा गिरावटसँगै कारोबार रकम पनि खुम्चिएको छ। अघिल्लो कारोबार दिन बिहीबार ११ अर्ब रुपैयाँभन्दा बढीको कारोबार भएको बजारमा सोमबार भने ७ अर्ब ९४ करोड रुपैयाँमा सीमित भएको छ।
नेपाल स्टक एक्सचेञ्ज (नेप्से) परिसूचक ८.१६ अंकले घटेर २६६२.९१ विन्दुमा झरेको छ। सेन्सेटिभ इन्डेक्स १.०६ अंक, फ्लोट इन्डेक्स ०.५६ अंक र सेन्सेटिभ फ्लोट इन्डेक्स ०.४१ अंकले घटेका छन्। दिनभर ३३५ कम्पनीका १ करोड ९६ लाख १६ हजार कित्ता सेयर ८० हजार ५५९ पटक किनबेच भएका छन्।
बजार ओरालो लागे पनि केही कम्पनीमा भने तीव्र वृद्धि देखिएको छ। बुद्धभूमि नेपाल हाइड्रोपावर, रिलायन्स स्पिनिङ मिल्स र सालपा विकास बैंकको सेयर सकारात्मक सर्किट लेभलमा कारोबार भएको छ। रिलायन्स र सालपा गत बिहीबार मात्रै सूचीकृत भई सोमबारदेखि नियमित कारोबारमा आएका कम्पनी हुन्। अपर साङ्गे हाइड्रोपावरको सेयर मूल्य पनि ८ प्रतिशतभन्दा बढीले बढेको छ।
यता, खानीखोला हाइड्रोपावरको सेयर मूल्य सर्वाधिक ९.३८ प्रतिशतले घटेको छ। समग्रमा ८६ कम्पनीको सेयर मूल्य बढ्दा १६३ कम्पनीको घटेको छ भने ९ कम्पनी स्थिर रहेका छन्।
उपसमूहतर्फ १३ मध्ये ३ समूहमा सामान्य वृद्धि देखिएको छ। वित्त, होटल तथा पर्यटन र उत्पादन तथा प्रशोधन समूह हरियालीमा रहँदा जलविद्युत समूह सर्वाधिक १.०२ प्रतिशतले घटेको छ।
कारोबार रकमका आधारमा रिडी हाइड्रोपावर शीर्ष स्थानमा रह्यो। उक्त कम्पनीको ६५ करोड ३ लाख रुपैयाँ बराबरको कारोबार भएको छ। आँखुखोला जलविद्युतको करिब ५२ करोड रुपैयाँ र ङादी ग्रुप पावरको ४८ करोड रुपैयाँभन्दा बढीको सेयर किनबेच भएको छ।
समग्र बजार घटे पनि नयाँ सूचीकृत कम्पनीमा लगानीकर्ताको आकर्षण र केही जलविद्युत कम्पनीमा उच्च कारोबार देखिनुले बजार अझै पनि क्षेत्रगत रूपमा सक्रिय रहेको संकेत गरेको छ।
