आर्थिकन्यूज
लण्डन। सार्वजनिक पद दुरुपयोग गरेको आरोपमा बेलायतका पूर्व राजकुमार एन्ड्रयु माउन्टबेटन–विन्डसर पक्राउ परेका छन् । एन्ड्रयु माउन्टबेटन बेलायतका राजा चार्ल्सका भाइ तथा पूर्व राजकुमार हुन् । थेम्स भ्याली प्रहरीले यौन अपराधी जेफरी एपस्टीनसँग गोप्य जानकारी साझा गरेको आरोपमा पूर्व राजकुमारको उजुरीको अनुसन्धान गरिरहेको बताएपछि उनलाई पक्राउ गरिएको हो ।
एन्ड्रयुले भने आफूले कुनै पनि गलत कार्य नगरेको बताउँदै आएका छन् । उनको राजकुमार उपाधि गत वर्ष गुमेको थियो भने उपाधिको अन्त्यसँगै उनले रोयल लज, प्यालेस अफ विन्डसर पनि छोड्नुपरेको थियो ।
उनलाई प्रहरीले कहाँबाट पक्राउ गरेकाे भन्ने खुल्न सकेको छैन, तर आज बिहान नोरफोकको स्यान्ड्रिङ्घममा केही नौला सवारी साधनहरू देखिएका थिए । उनले विन्डसरमा आफ्नो घर छोडेपछि स्यान्ड्रिङ्घममा बस्दै आएका थिए ।
पूर्व राजकुमार पक्राउ परेको यो पहिलो पटक हो । उनीमाथि दोषी यौन अपराधी जेफरी एपस्टीनसँग सम्बन्ध राखेको आरोप लागेको छ । बीबीसीका अनुसार उनलाई सार्वजनिक पदको दुरुपयोग गरेको आरोपमा पक्राउ गरिएको हो ।
यसैबीच, थेम्स भ्याली प्रहरीले एन्ड्रयूको पक्राउपछि एक विज्ञप्ति जारी गर्दै भनेको छ, ‘हाम्रो अनुसन्धानको एक भागको रूपमा, हामीले सार्वजनिक कार्यालयमा दुर्व्यवहारको शंकामा नोरफोकबाट ६० वर्ष भन्दा बढी उमेरका एक व्यक्तिलाई पक्राउ गरेका छौँ। बर्कशायर र नोरफोकका ठेगानाहरूमा पनि खोजी भइरहेको छ। ती व्यक्ति अहिले प्रहरी हिरासतमा छन् ।’
विज्ञप्तिमा भनिएको छ, ‘हामीले राष्ट्रिय निर्देशिकाअनुसार पक्राउ परेकाको नाम सार्वजनिक गर्दैनौँ । कृपया यो पनि ध्यान दिनुहोस् कि यो मुद्दा हाल सक्रिय छ, त्यसैले कुनै पनि प्रकारको प्रकाशन गर्दा अदालतको अवहेलनाबाट बच्न सावधानी अपनाउनु पर्छ ।’ सहायक प्रमुख प्रहरी हवल्दार ओलिभर राइटले विस्तृत मूल्यांकनपछि सार्वजनिक कार्यालयमा दुर्व्यवहारको आरोपमा अनुसन्धान सुरु भएको छ ।
