आर्थिकन्यूज
एजेन्सी । युनिभर्सिटी अफ फेयरफ्याक्सले प्राध्यापक डा. राजन थपलियालाई कम्प्युटर साइन्स, साइबर सेक्युरिटी तथा सूचना प्रविधि (IT) का सह-डीन पदमा नियुक्त गरेको छ। न्यूयोर्क निवासी डा. थपलिया संयुक्त राज्य अमेरिकामा स्थापित शिक्षाविद्, प्राध्यापक तथा अनुसन्धानकर्ता हुन्। उहाँले फेब्रुअरी १५, २०२६ देखि आफ्नो नयाँ जिम्मेवारी सम्हाल्नुभएको हो।
डा. राजन थपलिया एक विशिष्ट शैक्षिक नेतृत्वकर्ता, अवार्ड बिनिङ प्राध्यापक तथा कृत्रिम बुद्धिमत्ता (AI), डेटा साइन्स, मेसिन लर्निङ, कम्प्युटर साइन्स तथा उदीयमान प्रविधि क्षेत्रका परिचित व्यक्तिका रूपमा चिनिनुहुन्छ। उहाँसँग शैक्षिक प्रशासन, पीएचडी कार्यक्रमको नेतृत्व, संकाय विकास, पाठ्यक्रम नवप्रवर्तन तथा स्नातकोत्तर र विद्यावारिधि तहका विद्यार्थीहरूलाई लामो समयदेखि अध्यापन अनुभव रहेको छ। डा. थपलियाले अमेरिकाका विभिन्न राज्यमा अवस्थित विश्वविद्यालयहरूमा प्राध्यापकको रूपमा कार्यरत हुनुहुन्थ्यो।
साथै, विभिन्न नाम चलेका कम्पनीहरू जस्तै प्रोमेट्रिक, लर्निङ मेट आदिमा माथिल्लो तहको जिम्मेवार भूमिका निर्वाह गरिसक्नुभएको छ।
युनिभर्सिटी अफ फेयरफ्याक्समा आबद्ध हुनुअघि डा. थपलियाले गोल्डेन गेट युनिभर्सिटी (GGU Worldwide) मा डिजिटल तथा कम्प्युटर साइन्स अन्तर्गत डक्टोरल (DBA) कार्यक्रमका 'प्रोग्राम चेयर' (Program Chair) का रूपमा कार्यरत हुनुहुन्थ्यो। उक्त भूमिकामा उहाँले शैक्षिक गुणस्तर सुनिश्चितता, प्रत्यायनअनुरूप कार्यक्रम सुपरिवेक्षण, विद्यावारिधि मार्गदर्शन, मूल्यांकन रणनीति तथा रणनीतिक कार्यक्रम विकासमा नेतृत्व गर्नुभएको थियो।
गत वर्ष उनै डा. थपलियालाई संयुक्त राज्य अमेरिकाका शीर्ष २० मेसिन लर्निङ प्रभावशाली व्यक्तित्वहरू (Top 20 Machine Learning Influencers) मध्ये एकको रूपमा पनि सम्मानित गरिएको थियो। जसले विद्यार्थी, अनुसन्धानकर्ता तथा विश्वभरका पेशेवरहरूका लागि प्रविधि क्षेत्रमा उहाँको प्रभावशाली नेतृत्व र मार्गदर्शनलाई उजागर गर्दछ।
सह-डीनका रूपमा डा. थपलियाले विश्वविद्यालयको शैक्षिक मिशनलाई अघि बढाउँदै संकाय संलग्नता, पाठ्यक्रम उत्कृष्टता, शैक्षिक नवप्रवर्तन, कार्यक्रम मूल्यांकन तथा विद्यार्थी सफलता रणनीतिहरू सुदृढ बनाउन प्रमुख नेतृत्वदायी भूमिका निर्वाह गर्नुहुनेछ।
प्राध्यापकका रूपमा उहाँले संयुक्त राज्य अमेरिकाका विभिन्न विश्वविद्यालयहरूमा कृत्रिम बुद्धिमत्ता, डेटा साइन्स, सफ्टवेयर इन्जिनियरिङ तथा सूचना प्रविधि विषयमा स्नातकोत्तर (MS) र विद्यावारिधि (PhD) तहका पाठ्यक्रमहरू अध्यापन गर्नुहुन्छ। साथै, उहाँ पीएचडी शोधप्रबन्ध अध्यक्ष (Dissertation Chair) तथा विषयवस्तु विशेषज्ञ (SME) का रूपमा समेत कार्यरत रहँदै अनुसन्धानार्थीहरूलाई उन्नत अन्तरविषयक अनुसन्धानमा मार्गदर्शन गर्नुहुन्छ। उहाँ विभिन्न शैक्षिक जर्नल तथा प्रकाशन मञ्चहरूमा सम्पादक तथा समकक्ष समीक्षक (peer reviewer) का रूपमा पनि योगदान दिँदै आउनुभएको छ। डा. थपलियाले नेतृत्वलाई दृष्टि, निष्ठा र निरन्तर सुधारमार्फत अरूको सेवा गर्ने प्रक्रियाका रूपमा परिभाषित गर्नुहुन्छ, जसले सहकार्य, नवप्रवर्तन र आजीवन शिक्षामार्फत विद्यार्थी तथा संकायलाई उत्कृष्टता हासिल गर्न सशक्त बनाउँछ।
डा. राजन थपलियाले National University क्यालिफोर्निया बाट डेटा साइन्समा स्नातकोत्तर र विद्यावारिधि हासिल गरेका छन्। साथै उनले एमबिए (MBA) र मास्टर अफ पब्लिक हेल्थ (MPH) पनि प्राप्त गरेका छन्।
सन् २००२ मा स्थापना भएको युनिभर्सिटी अफ फेयरफ्याक्स करियरमुखी शिक्षाको बढ्दो माग पूरा गर्ने उद्देश्यले स्थापना गरिएको हो। विश्वविद्यालयको उद्देश्य परिवर्तनशील विश्वव्यापी बजारमा रोजगारदाता र विद्यार्थीहरूको आवश्यकता अनुरूप उत्कृष्ट तथा उच्च माग भएका दूरशिक्षा कार्यक्रमहरू प्रदान गर्नु हो। यसका कार्यक्रमहरूले व्यवहारिक (practitioner-focused) पाठ्यक्रममार्फत समालोचनात्मक सोच, प्रभावकारी सञ्चार तथा सहकार्यलाई प्रवर्द्धन गर्दै प्रयोगात्मक ज्ञान र अनुसन्धानलाई अघि बढाउँछन्।
शैक्षिक उत्कृष्टता, व्यावसायिक दक्षता तथा दूरदर्शी नेतृत्वको संयोजनसहित डा. राजन थपलियाले युनिभर्सिटी अफ फेयरफ्याक्सको दीर्घकालीन सफलतामा महत्वपूर्ण योगदान पुर्याउने अपेक्षा गरिएको छ। साथै, उहाँले बढ्दो डिजिटल विश्वमा भावी प्रविधि नेताहरूलाई प्रेरित गर्ने विश्वास लिइएको छ।
