आर्थिकन्यूज
काठमाडौँ। निजी क्षेत्रको सबैभन्दा ठूलो छाता संगठन नेपाल उद्योग बाणिज्य महासंघले आफ्नो केन्द्रीय र प्रदेश महासंघको साधारणसभा मिति तोक्न आगामी ५ चैतमा कार्यकारिणी समितिको बैठक डाक्ने निर्णय गरेको छ।
बुधबार बसेको महासंघ पदाधिकारीको बैठकले उक्त निर्णय गर्दै बैठकबाट प्रदेश र केन्द्रीय महासंघको साधारणसभाको मिति तय गर्ने व्यवस्था गरेको अध्यक्ष चन्द्रप्रसाद ढकालले जानकारी दिए। यसअघि २४ माघदेखि २ फागुनसम्म सातवटै प्रदेश महासंघको साधारणसभा सम्पन्न गर्ने योजना थियो, तर निर्वाचन आचारसंहिताका कारण निर्वाचन आयोगले अनुमति नदिँदा सभाहरू रोकिएका थिए।
महासंघको विधान अनुसार केन्द्रीय साधारणसभा चैत २८ र २९ मा हुनुपर्ने व्यवस्था छ। तर प्रदेशको साधारणसभा केन्द्रको सभा अघि कम्तीमा एक महिनाअघि सम्पन्न हुनुपर्छ र सूचना २१ दिनअघि सार्वजनिक गर्नुपर्ने व्यवस्था छ। यस आधारमा चैत ५ मा बस्ने कार्यकारिणी समितिको बैठकले प्रदेश महासंघको साधारणसभा मिति तोक्ने र त्यसपछि एक महिनापछि केन्द्रीय सभा हुने गरी तालिका निर्धारण गर्ने स्रोतले जनाएको छ।
यसपटक महासंघमा केन्द्र र प्रदेश पदाधिकारीको निर्वाचन पनि हुने भएकाले साधारणसभामा विशेष चासो रहेको छ। पदाधिकारीका प्रत्याशीहरूले समूह बनाएर निर्वाचन तयारी सुरु गरिसकेका छन्। यसरी महासंघको साधारणसभा आगामी महिनाभित्रै सम्पन्न हुने अपेक्षा गरिएको छ।
