आर्थिकन्यूज
काठमाडौँ। मेटलाइफ फाउन्डेसनले प्लान इन्टरनेशनल नेपालसँग सहकार्य गर्दै धनुषा जिल्लाको सबैला र शहीदनगर नगरपालिकामा युथ इकोनोमिक एम्पावरमेन्ट प्रोजेक्टको दोस्रो चरण सुरु गरेको छ।
यस पहलले विशेष गरी सीमांतकृत युवाहरू, विशेष गरी युवा महिलाहरूलाई सम्मानजनक र दिगो जीविकोपार्जनका अवसरमा पहुँच बढाउन सहयोग गर्ने लक्ष्य राखेको छ।
अमेरिकी डलर ८०,००० सहयोगमा सञ्चालन हुने यस परियोजनाले नेपालमा देखिएको उच्च युवा बेरोजगारी र लैङ्गिक संरचनात्मक अवरोधहरूको चुनौतीलाई सम्बोधन गर्ने उद्देश्य राखेको छ। परियोजनाले युवाहरूको वित्तीय र डिजिटल साक्षरता सुदृढ गर्दै उनीहरूलाई सूचित आर्थिक निर्णय लिन, डिजिटल भुक्तानी प्रयोग गर्न र औपचारिक बैंकिङ सेवासँग जोडिन सक्षम बनाउनेछ। साथै, बैंक, लघुवित्त संस्था र डिजिटल सेवा प्रदायकहरूसँगको सहकार्यले सुरक्षित वित्तीय उपकरणमा पहुँच विस्तार गर्नेछ।
परियोजनाले अभिभावक, सामुदायिक अगुवा र स्थानीय जनप्रतिनिधीहरूलाई पनि सक्रिय रूपमा संलग्न गराएर महिलाको आर्थिक सहभागितालाई सीमित गर्ने सामाजिक मान्यतामा सकारात्मक परिवर्तन ल्याउने प्रयास गर्नेछ।
कृषि प्रशोधन, पर्यटन र प्रविधि जस्ता बजारसँग मेल खाने व्यावसायिक तालिम, वैदेशिक रोजगारीमा प्रस्थानपूर्व तालिम र अन्तर्राष्ट्रिय रूपमा मान्यता प्राप्त सीप प्रमाणिकरण प्रदान गरिनेछ। सुरक्षित यातायात, लचिलो तालिका र बाल हेरचाह सहयोग जस्ता व्यवस्था युवाहरूको पूर्ण सहभागिता सुनिश्चित गर्नेछ।
एक वर्षको अवधिमा यो पहलले धनुषाका २०० भन्दा बढी युवालाई प्रत्यक्ष सहयोग गर्ने लक्ष्य राखेको छ। तीमध्ये १२० जनाले डिजिटल र वित्तीय साक्षरता तालिम, ७० जनाले व्यावसायिक वा सुरक्षित वैदेशिक रोजगारी तालिम पाउनेछन्। साथै ७० भन्दा बढी अभिभावक, रोजगारदाता र स्थानीय सरकारका प्रतिनिधीहरूलाई दीर्घकालीन परिवर्तनका लागि सहभागी गराइनेछ।
परियोजनाले सीप विकास, वित्तीय समावेशीकरण र सामुदायिक वकालतलाई सँगै अघि बढाउँदै धनुषामा युवाहरूको आर्थिक सहनशीलता र जीविकोपार्जनका अवसर विस्तार गर्ने लक्ष्य राखेको छ।
