आर्थिकन्यूज
काठमाडौं। साताको तेस्रो कारोबार दिन मंगलबार सेयर बजार दोहोरो अंकले बढ्दै निरन्तर उकालो यात्रामा देखिएको छ। नेपाल स्टक एक्सचेञ्ज परिसूचक २३.८३ अंकले बढेर २९६०.४० विन्दुमा पुगेको हो।
यस दिन ३४१ कम्पनीका ३ करोड ५८ लाख २२ हजार १९१ कित्ता सेयर १ लाख २६ हजार ९४७ पटक किनबेच हुँदा १४ अर्ब ८३ करोड ९१ लाख रुपैयाँ बराबरको कारोबार भएको छ। अघिल्लो दिनको तुलनामा कारोबार रकम भने घटेको छ।
उपसमूहतर्फ १३ मध्ये ८ समूहको परिसूचक बढ्दा ५ समूह ओरालो लागेका छन्। व्यापार समूह सर्वाधिक ९.१२ प्रतिशतले बढेको छ भने विकास बैंक र जलविद्युत समूह पनि उकालो लागेका छन्। यता होटल तथा पर्यटन, जीवन बीमा, निर्जीवन बीमा, लघुवित्त र अन्य समूह घटेका छन्।
यस दिन सालपा विकास बैंक, रिलायन्स स्पिनिङ मिल्स र सोलु हाइड्रोपावरका लगानीकर्ताले सकारात्मक सर्किटको लाभ उठाएका छन्। साथै हिमालयन पावर पार्टनर, भुजुङ हाइड्रोपावर, होटल फरेस्ट इन, विशाल बजार कम्पनी र सिन्धु विकास बैंकको सेयर मूल्य पनि करिब १० प्रतिशतसम्म बढेको छ।
कारोबार रकमका आधारमा राधी विद्युत कम्पनी र अपी पावर कम्पनी अग्रस्थानमा रहे।
पछिल्लो पाँच कारोबार दिनदेखि बजार निरन्तर बढिरहेको छ। यसअघि आइतबार ५४.५१ अंक र सोमबार ५.०१ अंकले बढेको बजारमा मंगलबार पनि सुधार जारी रह्यो।
विश्लेषकहरूका अनुसार नयाँ सरकार गठनको तयारी, नीतिगत स्थिरताको अपेक्षा र लगानीकर्ताको मनोबलमा सुधारका कारण बजारमा उत्साह देखिएको हो। लामो समय स्थिर रहेको बजारमा पछिल्ला दिनमा देखिएको उछालले लगानीकर्तामा नयाँ आशा थपेको छ।
