आर्थिकन्यूज
काठमाडौँ । एशिया अझै पनि विश्व आर्थिक वृद्धिको प्रमुख चालकका रूपमा कायम रहेको एक नयाँ प्रतिवेदनले देखाएको छ। मंगलबार सार्वजनिक ‘एशियाली आर्थिक दृष्टिकोण तथा एकीकरण प्रगति वार्षिक प्रतिवेदन २०२६’ अनुसार सन् २०२६ मा एशियाली अर्थतन्त्र ४.५ प्रतिशतले वृद्धि हुने अनुमान गरिएको छ।
प्रतिवेदनअनुसार विश्व कुल गार्हस्थ उत्पादन (जीडीपी) मा एशियाको हिस्सा निरन्तर बढ्दै २०२५ को ४९.२ प्रतिशतबाट २०२६ मा ४९.७ प्रतिशत पुग्ने अपेक्षा गरिएको छ।
प्रतिवेदन सार्वजनिक गर्ने बोआओ फोरम फर एशियाका महासचिव झाङ जुनले ‘एशियाली शताब्दी’ सुरु भइसकेको धारणा थप बलियो बन्दै गएको बताएका छन्। चुनौतीका बाबजुद एशियाली अर्थतन्त्र लचिलो र सकारात्मक दिशामा अघि बढिरहेको उनले उल्लेख गरे।
सन् २००१ मा स्थापना भएको उक्त संस्थाले क्षेत्रीय आर्थिक एकीकरण प्रवर्द्धन गर्दै आएको छ। यस वर्षको सम्मेलन चीनको हैनानमा मार्च २४ देखि २७ सम्म ‘साझा भविष्य निर्माणः नयाँ गतिशीलता, नयाँ अवसर, नयाँ सहकार्य’ नारासहित आयोजना भइरहेको छ।
प्रतिवेदनअनुसार एशिया विदेशी लगानीका लागि प्रमुख गन्तव्यका रूपमा स्थापित रहँदै आएको छ। विशेषगरी चीन र दक्षिणपूर्वी एशियाली राष्ट्रहरूको समूह लगानीका लागि सबैभन्दा आकर्षक केन्द्रका रूपमा देखिएका छन्।
प्रविधि क्षेत्रमा पनि एशिया तीव्र गतिमा अघि बढिरहेको छ। कृत्रिम बुद्धिमत्ता (एआई) विकासको केन्द्र क्रमशः युरोप र अमेरिकाबाट एशियातर्फ सर्दै गएको प्रतिवेदनमा उल्लेख छ। ठूलो डिजिटल जनसंख्या, विविध प्रयोग प्रणाली र स्पष्ट नीतिगत ढाँचाले एशियाली देशहरूलाई यस क्षेत्रमा अग्रणी बनाउँदै लगेको छ।
दिगो विकासतर्फ पनि एशिया महत्वपूर्ण शक्तिका रूपमा उदाउँदै गएको छ। परम्परागत ऊर्जाको ठूलो उपभोक्ता रहँदै आएको क्षेत्र अहिले स्वच्छ तथा हरित ऊर्जाको विकासमा समेत अग्रसर बन्दै गएको प्रतिवेदनले देखाएको छ।
क्षेत्रीय व्यापारमा सुधार देखिँदै एशियाभित्रकै व्यापार निर्भरता २०२३ को ५६.३ प्रतिशतबाट २०२४ मा ५७.२ प्रतिशत पुगेको छ, जसले क्षेत्रीय आर्थिक एकीकरण सुदृढ बन्दै गएको संकेत गर्छ।
विशेषज्ञहरूका अनुसार एशिया अब विश्व सेवा व्यापारको मुख्य चालक बन्ने दिशामा अघि बढिरहेको छ। डिजिटल पूर्वाधारमा बढ्दो लगानी, ठूलो बजारको माग र क्षेत्रीय सहकार्यले यस प्रवृत्तिलाई थप गति दिएको छ।
