आर्थिकन्यूज
काठमाडौं। उद्योगपति शंकरलाल अग्रवाललाई सम्पत्ति शुद्धीकरणसम्बन्धी मुद्दामा अनुसन्धानका लागि पक्राउ गरिएको छ। सम्पत्ति शुद्धीकरण अनुसन्धान विभागको आग्रहमा उनलाई शुक्रबार नियन्त्रणमा लिइएको हो। हाल अग्रवाललाई नेपाल प्रहरी को ललितपुर परिसरको हिरासतमा राखिएको छ।
प्रहरीका अनुसार अग्रवाललाई शुक्रबार दिउँसो नियन्त्रणमा लिएपछि विभागमा बयान लिइएको थियो। त्यसपछि थप अनुसन्धानका लागि हिरासतमा राखिएको हो। ललितपुर प्रहरी परिसरका प्रवक्ता एसपी गौतम मिश्रले अग्रवाल हिरासतमा रहेको पुष्टि गर्दै पक्राउ प्रक्रिया विभागको समन्वयमा भएको बताए।
अग्रवालमाथि कोरोना महामारीका बेला कालोबजारी गरेको, ठूलो परिमाणमा कर तथा भ्याट छली गरेको, विद्युत् प्राधिकरणको बक्यौता नतिरेको, गुणस्तरहीन वस्तु उत्पादन गरी उपभोक्ता ठगी गरेकोलगायत आरोप छन्। साथै फिडरलाइनसम्बन्धी अनियमिततामा समेत संलग्नता रहेको आशंका गरिएको छ।
यसअघि बिहीबार केन्द्रीय अनुसन्धान ब्युरोले व्यवसायी दीपक भट्टलाई पक्राउ गरी विभागमा बुझाएको थियो। भट्टको पासपोर्टसमेत रोक्का गरिएको छ। विभागले अग्रवाल, भट्ट र अन्य व्यवसायीमाथि संगठित आर्थिक अनियमितताको आशंकामा अनुसन्धान गरिरहेको छ।
औद्योगिक साम्राज्य र विवाद
शंकरलाल अग्रवाल नेतृत्वको शंकर ग्रुप नेपालका ठूला औद्योगिक घरानामध्ये एक हो। सन् १९७९ मा स्थापित समूहले स्टिल, सिमेन्ट, बीमा, ऊर्जा, कृषि, अटोमोबाइल लगायत विभिन्न क्षेत्रमा लगानी विस्तार गरेको छ।
विशेषतः जगदम्बा स्टिलमार्फत समूहले नेपालमै स्ट्रक्चरल स्टिल उत्पादन सुरु गर्दै निर्माण क्षेत्रमा ठूलो प्रभाव पारेको मानिन्छ। वार्षिक लाखौँ मेट्रिक टन उत्पादन क्षमता रहेको यो उद्योगले देशको पूर्वाधार विकासमा महत्त्वपूर्ण योगदान दिएको छ।
समूहअन्तर्गत सिमेन्ट, बीमा, जलविद्युत्, खाद्यान्न र मोबाइल वितरणलगायत ४० भन्दा बढी कम्पनी सञ्चालनमा छन्। समूहले हजारौँलाई रोजगारी दिएको र अर्बौँ रुपैयाँ कर तिरेको दाबी गर्दै आएको छ।
अनुसन्धानका क्रममा अग्रवाल र दीपक भट्टबीचको आर्थिक तथा व्यावसायिक सम्बन्ध पनि केन्द्रमा परेको छ। स्रोतका अनुसार राष्ट्र बैंकको वित्तीय जानकारी इकाईले शंकास्पद कारोबारबारे विभागलाई जानकारी गराएको थियो।
सन् २०२१ मा जगदम्बा स्टिलसँग सम्बन्धित खाताबाट भट्टको नाममा ठूलो रकम ट्रान्सफर भएको तर त्यसको विवरण अडिट प्रतिवेदनमा नदेखिएको पाइएको छ। सीमित कारोबारका लागि खोलिएको ओभरड्राफ्ट खातामार्फत ठूलो रकम चलाइएको तथ्य पनि अनुसन्धानको विषय बनेको छ।
भट्ट र अग्रवाल समूहबीच बीमा क्षेत्रमा पनि सहकार्य भएको आशंका गरिएको छ। विशेषतः हिमालयन रि-इन्स्योरेन्स सँग सम्बन्धित कारोबार र लाइसेन्स प्रक्रियामा अनियमितता भएको उजुरीहरू अनुसन्धानमा समेटिएका छन्।
यसैबीच, सरकारी नीतिगत निर्णयहरूलाई निजी फाइदाका लागि प्रयोग गरिएको आरोपसमेत उठेको छ। केही परियोजना र कर छुटसम्बन्धी निर्णयमा प्रभाव पारिएको दाबी अनुसन्धानको दायरामा छ।
अग्रवाल र भट्टको सम्बन्धलाई अनुसन्धानकर्ताले ‘क्यास फ्लो र राजनीतिक पहुँचको विनिमय’ का रूपमा हेरेका छन्। आर्थिक स्रोत र राजनीतिक प्रभावबीचको यस्तो सम्बन्धले राज्यलाई नोक्सान पुगेको आशंका गरिएको छ।
हाल अग्रवालमाथि लगाइएका आरोपहरू अनुसन्धानकै चरणमा छन्। दोष प्रमाणित भएमा कानुनी कारबाही हुने र निर्दोष प्रमाणित भएमा रिहा हुने प्रावधान छ।
९० वर्षको पारिवारिक व्यवसायिक इतिहास बोकेको शंकर ग्रुपका अध्यक्ष अग्रवाल हिरासतमा पुगेपछि नेपालको निजी क्षेत्र, राजनीति र नियामक निकायबीचको सम्बन्ध फेरि एकपटक बहसको विषय बनेको छ।
प्रतिक्रिया