आर्थिकन्यूज
काठमाडौ । इरानद्वारा बन्द गरिएको रणनीतिक महत्त्वको हर्मुज जलमार्ग पुन: सञ्चालनमा ल्याउन सैन्य बल प्रयोग गर्ने अरब राष्ट्रहरूको प्रस्तावलाई संयुक्त राष्ट्र संघको सुरक्षा परिषद् मा रुस, चीन र फ्रान्सले रोकिदिएका छन्। न्यूयोर्क टाइम्सका अनुसार, बहराइनको नेतृत्वमा खाडी मुलुकहरूले परिषद् मा एक प्रस्ताव पेश गरेका थिए । यसमा इरान विरुद्ध आवश्यक सैन्य कदम चाल्न अन्तर्राष्ट्रिय स्वीकृतिको माग गरिएको थियो। इरानले गत फेब्रुअरीदेखि यस जलमार्गमा अवरोध सिर्जना गरेपछि विश्वव्यापी तेल आपूर्ति र व्यापारमा गम्भीर संकट उत्पन्न भएको छ।
परिषद्का स्थायी सदस्यहरू रुस, चीन र फ्रान्सले सैन्य बल प्रयोगको अनुमति दिने कुनै पनि भाषाको विपक्षमा उभिएका छन् र उनीहरूले बल प्रयोग गर्दा मध्यपूर्वमा युद्ध अझै चर्कने चेतावनी दिएका छन्। बहराइनका विदेशमन्त्रीले इरानको कदमलाई अन्तर्राष्ट्रिय कानुनको उल्लंघन र आर्थिक आतंकवादको संज्ञा दिँदै नागरिक पूर्वाधार र विश्वव्यापी ढुवानीमा गम्भीर असर परेको बताएका छन्। हर्मुज जलमार्गबाट विश्वको कुल तेल आपूर्तिको करिब २० प्रतिशत ओसारपसार हुने भएकाले यसको अवरोधका कारण कतार जस्ता प्रमुख ग्यास निर्यातक राष्ट्रहरूले उत्पादन नै बन्द गर्नुपर्ने अवस्था आएको छ, जसले गर्दा अर्बौं डलरको क्षति भइरहेको छ।
चीनले सैन्य बल प्रयोगको सट्टा कूटनीतिक संवादमा जोड दिएको छ भने फ्रान्सले सैन्य कारबाही अवास्तविक हुने र यसले झन् ठूलो जोखिम निम्त्याउने टिप्पणी गरेको छ। अहिलेलाई यो प्रस्ताव पारित हुन नसकेपछि इरानले उक्त जलसन्धिमा आफ्नो नियन्त्रण कायम राख्ने मौका पाएको विश्लेषण गरिएको छ। सुरक्षा परिषद् मा आगामी हप्ता पुन: छलफल हुने भनिए तापनि हालसम्म कुनै निश्चित निष्कर्ष निस्कन सकेको छैन।
प्रतिक्रिया