आर्थिकन्यूज
काठमाण्डौ । ग्लोकल प्रालिद्वारा आयोजित 'गोल्छा गु्रपद्वारा प्रस्तुत ग्लोकल टिन हिरो २०२४' बाट रुकुमका १९ वर्षीय घनश्याम विश्वकर्मा सम्मानित भएका छन् ।
विश्वकर्मा एक सामाजिक कार्यकर्ता हुन्, जो रुकुमबाट बालबालिका र किशोर–किशोरीहरूको अधिकार र उत्थानका लागि आठ वर्षभन्दा बढी समयदेखि अभियान चलाउँदै आएका छन् । बाल अधिकार, मानसिक स्वास्थ्य, जलवायु र बाल विवाहविरुद्धको अभियानका लागि उनलाई सम्मान गरिएको हो ।
राष्ट्रिय किशोर–किशोरी बाल नेटवर्क नेपालका अध्यक्षको रूपमा, उनी बाल अधिकारको वकालतलाई अगाडि बढाइरहेका छन् । उनी विभिन्न संघ–संगठनहरूसँग सहकार्य गर्दै यौन र प्रजनन अधिकार, मानसिक स्वास्थ्य, जलवायु न्याय, र अनलाइन सुरक्षा जस्ता महत्वपूर्ण मुद्दाहरूको सम्बोधन गर्छन् । उनले बाल यौन शोषण विरुद्धको संघर्ष र रिपोर्टिङ प्रणालीलाई सुदृढ पार्न शैक्षिक कार्यशालाहरूको नेतृत्व गरेका छन्, जसले युवाहरूलाई आफैंलाई र आफ्ना साथीहरूलाई सुरक्षित राख्न सशक्त बनाउँछ । जलवायु न्यायका लागि अभियन्ताको रूपमा, उनी बालबालिकाको स्वस्थ वातावरणमा अधिकारको बारेमा कार्यशालाहरू आयोजना गर्छन्, जसले भविष्यका पुस्ताहरूको सुरक्षा सुनिश्चित गर्न वातावरणीय दिगोपनाको महत्त्वलाई जोड दिन्छ ।
ग्लोकल टिन हिरोले विगत दशकदेखि विभिन्न क्षेत्रमा विशिष्टता हासिल गर्ने समुदायमा महत्वपूर्ण योगदान गरेका किशोर–किशोरीहरुलाई सम्मानित गर्दै आएको छ ।
गोल्छा ग्रुपद्वारा प्रस्तुत ग्लोकल टिन हिरोका अन्तिम ६ प्रतिस्पर्धीमा विश्वकर्मासहित आशिष पन्थी, प्राविधिक शिक्षक, कपिलवस्तु; निश्चल भट्टराई, शैक्षिक कार्यकर्ता, स्याङ्जा; पूर्णिमा तिम्सिना, बाल अधिकार कार्यकर्ता, झापा; सजनी शर्मा, सामाजिक कार्यकर्ता, कास्की र श्रीजय सुवेदी, प्राविधिक उत्साही, पर्सा बीच ग्लोकल टिन हिरोका रुपमा चयन गरिएको थियो ।
