आर्थिकन्यूज
काठमाडौं । आजदेखि प्रथम नेपाल एप्पल फेस्ट २०२४ (स्याउ मेला २०८१) सुरु भएके छ । होटल मनाङ, ठमेलको सहकार्यमा किसान भेन्चरले आयोजना गरेको मेला होटल मनाङमा सुरु भएको हो ।
आगामी शनिबारसम्म चल्ने उक्त मेलामा ३७ वटा भेराइटी डिस्प्ले गरिएको किसान भेन्चरका सीईओ राजेश कार्कीले जानकारी दिए । यद्यपि, केही भेराइटी भने बाटोमै रोकिएको उनको भनाइ छ । 'धेरै भेराइटीका स्याउ आइसकेका छन् । तर केही भने बाढीपहिरोका कारण अवरुद्ध सडकका कारण बाटोमै रोकिएका छन्, साँझ/भोलि बिहानसम्म सबै आइपुग्छ,' उनले भने । प्रदर्शनमा ३७ प्रजातिका स्याउ राखे पनि बिक्री भने ८ प्रजातिका मात्रै गरिने उनले जानकारी दिए । होटल मनाङमा विभिन्न सेसनसहित मेला सुरु गरिएकोमा स्याउको बिक्री कक्ष उत्पला क्याफे बौद्धमा पनि राखिएको छ ।
नेपाल एप्पल फेस्ट २०२४ को उद्देश्य नेपालमा स्याउ खेतीको समृद्ध विरासतलाई प्रोत्साहन गर्नु, विभिन्न प्रजातिका स्याउको प्रदर्शन एवं नेपालमा कृषिको सम्भावनालाई प्रवर्द्धन गर्नु रहेको आयोजकले जनाएको छ । स्थानीय किसानसँग स्याउ खरिद गरेर उपभोक्ता, आपूर्तिकर्ता र उद्योग विशेषज्ञसँग सिधा सम्पर्क बनाउनु यस कार्यक्रमको मुख्य उद्देश्य रहेको कार्कीले बताए ।
यसअघि नेपाली उत्पादनलाई समर्थन गर्न र ताजा तथा स्वस्थ आँपको स्वाद बाँड्न गत असार पहिलो साता किसान भेन्चरको आयोजनामा प्रथम आँप मेला भएकोमा त्यसपश्चात् आयोजना गरिएको यो दोस्रो कार्यक्रम हो भने, नेपालमा पहिलो पटक स्थानीय उत्पादनलाई प्रोत्साहन गर्न स्याउ महोत्सव आयोजना गरिएको आयोजकको भनाइ छ ।
महोत्सवमा जुम्ला, हुम्ला, बाजुरा, मनाङ, मुस्ताङ, जाजरकोटसहित विभिन्न जिल्लाबाट ल्याइएका ५० मेट्रिक टन स्याउ प्रदर्शनमा राखिएका छन् । गाला, फुजी, रेड डेलिसियस र गोल्डेन स्याउका एप्पल स्मुथ, एप्पल पानीपुरी, एप्पल लेमन मिन्ट, मनाङ एप्पल सलाद, एप्पल चिकेन विथ राइस, एप्पल पनिर विथ राइस, एप्पल पाई, एप्पल टार्ट, एप्पल आइसक्रिम, एप्पल केकलगायत ११ भन्दा बढी परिकारहरुको स्वाद प्रदर्शनीस्थलमा चाख्न पाइनेछ ।
तीन दिनसम्म चल्ने मेलामा बिहान १० बजेदेखि साँझ ६ बजेसम्म अवलोकन गर्न र स्याउ खरिद गर्न सकिने बताइएको छ ।
