आर्थिकन्यूज
एजेन्सी । इजरायलले हिजबुल्लाह प्रमुख हसन नसरल्लाहका ज्वाइँ हसन जाफर अल कासिरलाई मारेको दाबी गरेको छ । समाचार एजेन्सी एएफपीका अनुसार इजरायली सेनाले बुधबार सिरियाको राजधानी दमास्कसमा हवाई आक्रमण गरेको थियो जसमा उनको मृत्यु भएको थियो। उनीसँगै थप दुई जनाको मृत्यु भएको विदेशी सञ्चारमाध्यमले जनाएका छन ।
सेप्टेम्बर २७ मा इजरायलले राजधानी बेरुतमा रहेको हिजबुल्लाहको मुख्यालयमा ८० टन बमले आक्रमण गरेको थियो। जसमा हिजबुल्लाह प्रमुख नसरल्लाह मारिएका थिए । यस हमलामा नसरल्लाह बाहेक उनकी छोरी जैनबको पनि मृत्यु भएको थियो ।
इजरायल एकैसाथ धेरै मोर्चामा लडिरहेको छ। लेबनानमा हिजबुल्लाह, गाजामा हमास, यमनमा हुथी विद्रोही बाहेक इजरायली सेनाले सिरिया र इरानको सामना गरिरहेको छ । इरानका सर्वोच्च नेता आयतोल्लाह अली खामेनीले हिजबुल्लाह प्रमुख हसन नसरल्लाहलाई इजरायली आक्रमण अघि लेबनानबाट भाग्न चेतावनी दिएका थिए। टाइम्स अफ इजरायलले तीन इरानी स्रोतलाई उद्धृत गर्दै यो जानकारी दिएको हो।
रिपोर्टका अनुसार सेप्टेम्बर १७ को पेजर हमलापछि खामेनीले नसरल्लाहलाई इरान आउन आग्रह गर्दै सन्देश पठाएका थिए । खामेनीले हिजबुल्लाहभित्र इजरायली एजेन्टहरू रहेको र उनीहरूलाई मार्ने योजना बनाएको बताएका थिए।
नसरल्लाहले इस्लामिक रिभोलुसनरी गार्ड कोरका शीर्ष कमाण्डर ब्रिगेडियर जनरल अब्बास निलफोरौसनलाई बेरुत गएर हिजबुल्लाह प्रमुखलाई यो सन्देश पुर्याउन आग्रह गरेका थिए। इजरायली आक्रमणमा आईआरजीसीका एक कमाण्डर पनि मारिएका छन् । त्यतिबेला उनी नसरल्लाहसँगै थिए । प्रतिवेदनमा यो पनि भनिएको छ कि खामेनी तेहरानमा सरकारी चौकीहरूमा इजरायली घुसपैठको बारेमा धेरै चिन्तित छन्।
