आर्थिकन्यूज
एजेन्सी । इजरायल र हमासबीच गाजामा युद्धविराम र इजरायली बन्धकहरूको रिहाइका लागि भएको सम्झौताका सर्तहरू अन्तिम चरणमा छन् । यस युद्धविरामका लागि जारी वार्ताको अनुगमन गरिरहेका प्यालेस्टिनी अधिकारीले बीबीसीलाई यो जानकारी दिएका छन् । यो खबर यस्तो बेला आएको हो जब अमेरिकी राष्ट्रपति जो बाइडेनले सम्झौता अन्तिम चरणमा पुगेको र उनको प्रशासनले यस विषयमा लगनशीलताका साथ काम गरिरहेको बताएका छन् ।
एक इजरायली अधिकारीले समाचार एजेन्सी रोयटर्सलाई पनि वार्ता 'अन्तिम चरण' मा रहेको र 'केही घण्टा वा दिनमा' सहमति हुन सक्ने बताए ।अमेरिकी राष्ट्रपति जो बाइडेनले आइतवार इजरायली प्रधानमन्त्री बेन्जामिन नेतान्याहु र सोमबार वार्ताको मध्यस्थता गरिरहेका कतारका शेख तमिम बिन हमाद अल थानीसँग कुरा गरेका थिए ।
एक प्यालेस्टिनी अधिकारीले हमास र इजरायली अधिकारीहरू सोमबार एउटा भवनमा वार्ता गरिरहेको बताए ।
इजरायल र हमासबीचको यो युद्ध ७ अक्टोबर २०२३ मा हमासले दक्षिणी इजरायलमा आक्रमण गरेपछि सुरु भएको थियो । यस हमलामा १,२०० मानिस मारिएका थिए र हमासले अन्य २५१ जनालाई बन्धक बनाएका थिए । जवाफमा इजरायलले गाजामा हमासविरुद्ध सैन्य आक्रमण सुरु गरेको थियो । गाजाको हमासद्वारा सञ्चालित स्वास्थ्य मन्त्रालयका अनुसार यी आक्रमणमा ४६ हजार ५०० भन्दा बढी प्यालेस्टिनी मारिएका छन्।
यी हुनसक्छन् युद्धविरामका सम्भावित शर्तहरू
यस युद्धविराम सम्झौताको दोस्रो र तेस्रो चरणको वार्ता पहिलो चरणको १६ औं दिनबाट सुरु हुनेछ । दुवै पक्ष सहमत भएका छन् । हमासले सम्झौताको पहिलो दिन तीन जना बन्धकहरूलाई रिहा गर्नेछ, त्यसपछि इजरायलले जनसंख्या भएको क्षेत्रबाट आफ्ना सेना फिर्ता गर्न थाल्नेछ।
सात दिन पछि, हमासले थप चार जना बन्धकहरूलाई रिहा गर्नेछ र इजरायलले दक्षिणबाट विस्थापित मानिसहरूलाई उत्तरमा फर्कन अनुमति दिनेछ, तर तटीय सडकहरूबाट पैदलबाट मात्रै ।
कार, जनावरहरूले तानेका गाडाहरू र ट्रकहरू सालाह अल-दिन रोडको साथ सडक पार गर्न अनुमति दिइनेछ । कतार र इजिप्टको प्राविधिक सुरक्षा टोलीद्वारा सञ्चालित एक्स–रे मेसिनबाट यसको अनुगमन हुनेछ ।
