आर्थिकन्यूज
काठमाडौं । विशाल ग्रुप परिवार सदस्यहरूले जीवन बीमा कम्पनीहरूमा लगानी वृद्धि गरिरहेका छन् । उक्त ग्रुपका सदस्यहरूले सूर्यज्योति लाइफ इन्स्योरेन्स कम्पनीमा लगानी वृद्धि गर्दै छन् ।
लाइफ इन्स्योरेन्स कर्पाेरेशन नेपाल (एलआईसी)मा विशाल ग्रुप र ग्रुपका सदस्यहरूको शेयर २० प्रतिशत भन्दा धेरै रहेको छ । जहाँ ग्रुपको नाममा १७.३२ र ग्रुप परिवारका सदस्य जगदीश प्रसाद अग्रवालको १.९२ प्रतिशत रहेको छ । अन्य सदस्यहरूको पनि शेयर सो कम्पनीमा रहेको छ ।
एलआईसीमा उक्त मात्रामा शेयर होल्ड गरेको उक्त ग्रुपका परिवारले सूर्यज्योति लाइफमा पनि २७ प्रतिशत बढी शेयर होल्ड गरिसकेका छन् । जहाँ अर्पित अग्रवाल, अशोक कुमार अग्रवाल, निकुञ्ज अग्रवाल, उशा अग्रवाल, त्रिलोक चन्द्र अग्रवाल लगायतको परिवार सदस्य र उनीहरुको नाममा खुलेका कम्पनीहरूको नाममा २७ प्रतिशत बढी शेयर रहेको छ । यसका साथै परिवारका सदस्यहरूले कम्पनीमा स्वामित्व वृद्धि पनि गर्दै गएका छन् ।
जहाँ सबैभन्दा धेरै स्वामित्व नितेश अग्रवालको रहेको छ । उनको शेयर स्वामित्व ५.५९ प्रतिशत छ, जुन अघिल्लो वर्ष ५.०७ प्रतिशत थियो । उशा अग्रवालको ५.०२ प्रतिशत रहेको छ भने अर्पित अग्रवालको ४.५९ प्रतिशत छ । अघिल्लो वर्ष अर्पितको स्वामित्व ४.१३ प्रतिशत थियो ।
युनाइटेड इन्भेस्टमेन्ट प्रालिको ३.८०, त्रिलोक चन्द्र अग्रवालको ३.६५ र निकुञ्ज अग्रवालको ३.६३ प्रतिशत स्वामित्व रहेको छ । अघिल्लो वर्ष त्रिलोकको ३.३१ र निकुञ्जको ३.२६ प्रतिशत थियो ।
कम्पनीमा एनआईसी एशियन बैंकले भने स्वामित्व घटाएको छ । बैंकले २.४७ प्रतिशतबाट स्वामित्व घटाएर १.७८ प्रतिशत कायम गरेको छ । कम्पनीमा सिटी एक्सप्रेस मनि ट्रान्सफरको स्वामित्व १.०२, शिरिश मुरारकाको १.०५ रहेको छ ।
