डोङफेङको भोयाद्वारा ताइशान एक्स८ एसयूभी सार्वजनिक

काठमाडौं । डोङफेङ माेटर काेर्पाेरेशन अन्तर्गतको प्रिमियम ब्रान्ड Voyah ले नयाँ ताइशान X8 SUV सार्वजनिक गरेको छ। पाँच सिट क्षमताको यो ठूलो SUV इलेक्ट्रिक (EV) र प्लग–इन हाइब्रिड (PHEV) दुवै संस्करणमा उपलब्ध हुनेछ। PHEV भर्सनले अधिकतम ३१० किलोमिटरसम्म शुद्ध EV रेन्ज दिने दाबी गरिएको छ।

नयाँ ताइशान X8 मा HarmonyOS को नयाँ पुस्ताको ककपिट सिस्टम प्रयोग गरिएको छ, जसले यसलाई यो सिस्टम अपनाउने पहिलो गाडी बनाएको छ। इन्टेरियरमा डुअल १५.६ इन्च 2K इन्फोटेनमेन्ट स्क्रिन समावेश छन्, जसको ब्राइटनेस १००० निटसम्म पुग्छ। यी स्क्रिन छुट्टाछुट्टै वा सँगै सञ्चालन गर्न सकिन्छ।

ताइशान X8 भोयाको SUV लाइनअपमा चौथो मोडल तथा ‘ताइशान’ सिरिजअन्तर्गत दोस्रो मोडल हो। यसअघि सार्वजनिक ‘ताइशान’ मोडलको तुलनामा X8 केही सानो भए पनि डिजाइन भाषा मिल्दोजुल्दो राखिएको छ। X8 मा ठूलो क्रोम ग्रिलजस्ता केही एलिमेन्टहरू कम गरिएको छ, जसले यसलाई अझ आधुनिक र सन्तुलित लुक दिएको छ।

आकारका हिसाबले गाडीको लम्बाइ ५२०० मिमी, चौडाइ २०२५ मिमी, उचाइ १८१४ मिमी र ह्विलबेस ३०९० मिमी रहेको छ। पावरट्रेनतर्फ, यसमा 800V प्लेटफर्म र 5C फास्ट–चार्जिङ सपोर्ट हुनेछ। EV संस्करणमा अधिकतम १२० kWh ब्याट्री रहनेछ भने PHEV संस्करणमा ६५ kWh क्षमताको ब्याट्री प्रयोग गरिएको छ, जुन सम्भवतः CATL द्वारा आपूर्ति गरिएको हो।

कम्पनीका अनुसार ताइशान X8 सन् २०२६ को मध्यदेखि अर्डरका लागि खुल्नेछ। मूल्य आधिकारिक रूपमा घोषणा नभए पनि यो फ्ल्यागशिप ‘ताइशान’ भन्दा सस्तो हुने अनुमान गरिएको छ।

यो मोडल चीनको प्रतिस्पर्धात्मक न्यू–इनर्जी SUV बजारमा BYD को Bao 8, Zeekr 8X तथा Aito M8 जस्ता गाडीहरूसँग प्रतिस्पर्धामा उत्रिनेछ।

अन्तर्राष्ट्रिय बजारका लागि भने यसको नाम “Titan X8” हुन सक्ने संकेत देखिएको छ, जसले विश्व बजारमा पनि यसको विस्तारको सम्भावना देखाउँछ।