आर्थिकन्यूज
काठमाडौं। आन्तरिक उडानमा केन्द्रित श्री एयरलाइन्स अब क्षेत्रीय अन्तर्राष्ट्रिय बजारमा प्रवेश गर्ने तयारीमा जुटेको छ। नेपाल नागरिक उड्डयन प्राधिकरणले नियमित अन्तर्राष्ट्रिय उडानको अनुमति दिएसँगै कम्पनीले भारत र बंगलादेशलाई प्रारम्भिक गन्तव्य बनाउँदै विस्तार योजना अघि बढाएको हो।
हालसम्म ‘नन–सेड्युल’ चार्टर उडानमा सीमित रहेको कम्पनीले अब नियमित उडानमार्फत नयाँ बजारमा प्रतिस्पर्धा गर्ने आधार बनाएको छ। कम्पनीका प्रबन्ध निर्देशक अनिल मानन्धरका अनुसार अन्तर्राष्ट्रिय उडानका लागि आवश्यक सरकारी प्रक्रिया अघि बढिसकेको छ र सम्बन्धित देशसँग समन्वय जारी छ।
यो अनुमति श्रीका लागि केवल उडान विस्तार मात्र नभई व्यावसायिक रूपान्तरणको चरण पनि हो। आन्तरिक उडानमा दैनिक करिब ४० उडान सञ्चालन गर्दै आएको कम्पनीले अब क्षेत्रीय कनेक्टिभिटी, यात्रु विविधीकरण र आम्दानीका नयाँ स्रोत खोज्ने लक्ष्य राखेको छ।
प्राधिकरणले दिएको अनुमति परीक्षण उडानको सफलतापछि आएको हो। गत चैतमा कोलकातामा गरिएको परीक्षण उडानमा प्राविधिक मूल्यांकन सकारात्मक देखिएपछि अन्तर्राष्ट्रिय उडानका लागि बाटो खुलेको हो।
हाल १७ वटा विमान रहेको श्रीले पहिलो चरणमा ड्यास–८०० र सीआरजे–२०० जेटमार्फत नजिकका अन्तर्राष्ट्रिय गन्तव्यमा उडान गर्ने योजना बनाएको छ। साथै, आगामी एक वर्षभित्र तीनवटा ‘न्यारोबडी’ जहाज थप्ने तयारीले कम्पनीलाई अझ ठूला बजारतर्फ लैजाने संकेत गर्छ।
नेपालको उड्डयन क्षेत्रमा यसअघि बुद्ध एयरले मात्र नियमित अन्तर्राष्ट्रिय उडान सञ्चालन गरिरहेको अवस्थामा श्रीको प्रवेशले प्रतिस्पर्धा बढ्ने अपेक्षा गरिएको छ। यसले यात्रु सेवाको गुणस्तर र भाडा संरचनामा समेत प्रभाव पार्न सक्ने विश्लेषण गरिएको छ।
सन् १९९९ मा स्थापना भएको श्री एयरलाइन्सले हेलिकोप्टर सेवाबाट सुरु गरी पछिल्ला वर्षहरूमा आन्तरिक उडान बजारमा विस्तार गरेको हो। अब अन्तर्राष्ट्रिय बजारमा पाइला टेक्दै कम्पनीले आफ्नो पहिचानलाई नयाँ स्तरमा पुर्याउने लक्ष्य राखेको छ।
प्रतिक्रिया