आर्थिकन्यूज
वासिङ्टन। अमेरिकी राष्ट्रपति डोनाल्ड ट्रम्प ले इरानले पठाएको नयाँ शान्ति प्रस्तावप्रति सशंकित प्रतिक्रिया जनाएका छन्। प्रस्तावको समीक्षा गर्ने बताए पनि त्यसलाई स्वीकार गर्ने सम्भावना कम रहेको उनले संकेत गरेका छन्।
शनिबार पत्रकारहरूसँग कुरा गर्दै ट्रम्पले इरानको विगतका गतिविधि उल्लेख गर्दै वर्तमान प्रस्तावप्रति भरोसा गर्न कठिन भएको बताएका हुन्। “हामी हेर्दैछौं, तर उनीहरूको विगतका कारण विश्वस्त हुन गाह्रो छ,” उनले भने।
उनले आवश्यक परे पुनः सैन्य कारबाही हुन सक्ने सम्भावनालाई पनि नकारेनन्। “यदि उनीहरूले समस्या सिर्जना गरे भने विकल्प खुला छ,” ट्रम्पको भनाइ थियो।
यसैबीच, इरान ले मध्यस्थकर्तामार्फत १४ बुँदे शान्ति प्रस्ताव अघि सारेको छ। प्रस्तावमा सबै मोर्चामा द्वन्द्व अन्त्य गर्ने र रणनीतिक महत्वको हर्मुज जलडमरूमध्य को व्यवस्थापनका लागि नयाँ ढाँचा बनाउने विषय समावेश छ।
इरानी सैन्य अधिकारीहरूले अमेरिका–इरानबीच पुनः द्वन्द्व चर्किन सक्ने चेतावनी दिएका छन्। उनीहरूले अमेरिकाले विगतका सम्झौताहरू पूर्ण रूपमा कार्यान्वयन नगरेको आरोप लगाएका छन्। इरानका उपविदेशमन्त्रीले भने अब शान्ति वा टकराव रोज्ने निर्णय संयुक्त राज्य अमेरिका कै हातमा रहेको बताएका छन्।
हर्मुज जलडमरूमध्यमा बढ्दो तनावका कारण अन्तर्राष्ट्रिय तेल आपूर्ति प्रभावित हुँदै गएको छ। यसले विश्व बजारमा मूल्य वृद्धि गरिरहेको छ भने इरानको अर्थतन्त्रमा पनि दबाब बढेको छ। तेल निर्यात घट्दै गएको र मुद्रास्फीति उच्च स्तरमा पुगेको बताइएको छ।
प्रतिक्रिया