होर्मुज तनावको असर: बंगलादेशमा ऊर्जा संकट, जनजीवन अस्तव्यस्त

ढाका । मध्यपूर्वमा बढ्दो तनाव र ‘स्ट्रेट अफ होर्मुज’ (Strait of Hormuz) बन्द हुनुको गम्भीर असर दक्षिण एसियाली मुलुक बंगलादेशमा देखिन थालेको छ। इरान, इजरायल र अमेरिकाबीचको बढ्दो द्वन्द्वका कारण बंगलादेश यतिबेला निकै गहिरो ऊर्जा संकटको चपेटामा परेको छ।

आफ्नो ऊर्जा आवश्यकताको करिब ९५ प्रतिशत इन्धन आयातमा निर्भर बंगलादेशमा इन्धन अभावले अर्थव्यवस्था नै धराशायी हुने अवस्था पुगेको छ। देशमा हाल अघोषित संकटकाल जस्तै स्थिति सिर्जना भएको छ।

पेट्रोल पम्पमा युद्धग्रस्त क्षेत्रजस्तै दृश्य

बंगलादेशका पेट्रोल पम्पहरूमा सवारी साधनको किलोमिटरसम्म लामो ताँती लागेको छ। मानिसहरू घण्टौँ होइन, आधा दिनभन्दा बढी समय पालो कुरेर बसिरहेका छन्। अलजजीरासँग कुरा गर्दै ४८ वर्षीय बस चालक अब्दुल गनीले आफ्नो बसमा डिजेल भर्न साढे पाँच घण्टा लामबद्ध हुनुपरेको पीडा सुनाए।

इन्धनको चरम अभाव भएपछि प्रशासनले तेलको ‘राशनिङ’ सुरु गरेको छ। अब हरेक सवारी साधनलाई निश्चित परिमाणमा मात्रै पेट्रोल वा डिजेल उपलब्ध गराइनेछ।

बिजुली बचत गर्न कामका घण्टामा कटौती र विद्यालय बन्द

ऊर्जा संकटको सामना गर्न सरकारले हतार-हतार केही कडा कदमहरू चालेको छ। नेशनल ग्रिडमा लोड कम गर्नका लागि सरकारी तथा निजी कार्यालयहरूको कार्यसमयमा कटौती गरिएको छ। इन्धन अभावका कारण यातायात सेवा ठप्प भएपछि विद्यार्थी र शिक्षकहरूलाई आवागमनमा समस्या भएको भन्दै लामो समयका लागि स्कूल र कलेजहरू समेत बन्द गरिएका छन्।

विश्व राजनीति र बंगलादेशको मार

यो संकटको मुख्य कारण विश्वको अधिकांश कच्चा तेल ओसारपसार हुने ‘स्ट्रेट अफ होर्मुज’ मार्गमा उत्पन्न असुरक्षा हो। इरान र अमेरिका–इजरायलबीचको युद्धले यो समुद्री मार्ग जोखिमपूर्ण बनेपछि बंगलादेशसम्म इन्धन आपूर्ति रोकिएको छ।

टाढाको देशमा भइरहेको युद्धको मूल्य आफ्नो भान्सा र सडकमा चुकाउनु परेपछि बंगलादेशी जनतामा विश्व शक्ति राष्ट्रहरूप्रति आक्रोश बढ्दो छ। यो संकटले बंगलादेशको पूर्वाधार र आर्थिक वृद्धिलाई ठूलो धक्का पुर्‍याउने अनुमान गरिएको छ।