आर्थिकन्यूज
काठमाडौँ । भारतीय औषधि कम्पनी सन फार्मास्युटिकलले अमेरिकी महिला स्वास्थ्य सेवा कम्पनी अर्गाननलाई ११ अर्ब ७५ करोड डलरमा खरिद गर्ने सहमति जनाएको छ । यसलाई भारतीय औषधि उद्योगको विश्व बजारमा प्रभाव विस्तार गर्ने रणनीतिक कदमका रूपमा हेरिएको छ ।
सोमबार सार्वजनिक संयुक्त विज्ञप्तिअनुसार सन फार्माले अर्गाननका सबै जारी सेयर प्रतिसेयर १४ डलरका दरले पूर्ण नगद कारोबारमार्फत किन्नेछ । दुवै कम्पनीका सञ्चालक समितिबाट स्वीकृत भइसकेको यो सम्झौता आवश्यक नियामक र सेयरधनी अनुमोदनपछि सन् २०२७ को सुरुतिर अन्तिम रूप लिने अपेक्षा गरिएको छ ।
सन फार्माका अध्यक्ष दिलीप साङ्घवीले अर्गाननको विश्वव्यापी सञ्जाल, उत्पादन पोर्टफोलियो र प्राविधिक क्षमताले कम्पनीको दीर्घकालीन वृद्धि रणनीतिमा टेवा पुग्ने बताए । उनका अनुसार यस अधिग्रहणले कम्पनीलाई अझ विविध र प्रतिस्पर्धी बनाउँदै नयाँ बजारमा विस्तार गर्न सहयोग गर्नेछ ।
कम्पनीले यस सम्झौतामार्फत ‘इनोभेटिभ मेडिसिन’ क्षेत्रमा आफ्नो उपस्थिति मजबुत बनाउने लक्ष्य लिएको छ । साथै, बायोसिमिलर औषधि क्षेत्रमा प्रवेश गर्दै विश्वका अग्रणी कम्पनीहरूको सूचीमा स्थान बनाउने योजना रहेको जनाएको छ ।
अर्गाननकी प्रमुख केरी कक्सले पनि यो सम्झौताले आफ्ना सेयरधनीहरूलाई आकर्षक प्रतिफल दिने र कम्पनीको भावी विकासका लागि नयाँ अवसर सिर्जना गर्ने बताइन् ।
विश्वको ‘फार्मेसी’का रूपमा परिचित भारतबाट हालैका वर्षहरूमा औषधि निर्यात तीव्र रूपमा बढ्दै गएको छ । परम्परागत रूपमा सस्तो जेनेरिक औषधिमा केन्द्रित भारतीय कम्पनीहरू अहिले उच्च मूल्यका नवप्रवर्तनशील उपचारतर्फ उन्मुख भइरहेका छन् ।
यस परिप्रेक्ष्यमा सन फार्मा–अर्गानन सम्झौता केवल व्यावसायिक कारोबार मात्र नभई भारतीय औषधि उद्योगको बदलिँदो रणनीति र विश्व बजारमा बढ्दो प्रभावको संकेतका रूपमा समेत विश्लेषण गरिएको छ ।
प्रतिक्रिया