आर्थिकन्यूज
काठमाडौं। मध्यपूर्व तनावका कारण मूल्यवृद्धि अपेक्षाभन्दा बढी बढेमा अमेरिकाले पुनः ब्याजदर वृद्धि गर्नुपर्ने अवस्था आउन सक्ने संकेत फेडरल रिजर्भका एक उच्च अधिकारीले दिएका छन् ।
मिनियापोलिस फेडका अध्यक्ष नील काशकारीले श्रम बजारमा दबाब बढ्ने जोखिम हुँदाहुँदै पनि मुद्रास्फीति नियन्त्रणका लागि ब्याजदर बढाउने विकल्प खुला राख्नुपर्ने बताएका छन् । “ठूलो मूल्यवृद्धिको झट्काले सार्वजनिक अपेक्षामा परिवर्तन ल्याउन सक्छ, त्यसविरुद्ध फेडले कदम चाल्नैपर्छ,” उनले भने ।
दुई दिने नीति बैठकपछि जारी निर्णयप्रति असहमति जनाउने चार अधिकारीमध्ये काशकारी पनि एक थिए । १२ सदस्यीय दर निर्धारण समितिमा यति धेरै असहमति देखिएको यो सन् १९९२ पछिकै ठूलो हो।
फेडका अन्य अधिकारी बेथ ह्याम्याक र लोरी लोगानले ब्याजदर स्थिर राख्ने निर्णयलाई समर्थन गरे पनि तीव्र मुद्रास्फीतिको जोखिमबारे चिन्ता व्यक्त गरेका छन् । उनीहरूले तेल मूल्य वृद्धि र आपूर्ति अवरोधलाई प्रमुख जोखिमका रूपमा औँल्याएका छन् ।
यता, फेडका गभर्नर स्टिफन मिरानले भने मुद्रास्फीति नियन्त्रणका लागि ब्याजदर घटाउनुपर्ने धारणा राखेका छन्, जसले नीतिगत मतभेद झन् स्पष्ट बनाएको छ ।
विशेषगरी मध्यपूर्व द्वन्द्वका कारण स्ट्रेट अफ हर्मुजमा अवरोध हुने जोखिमले ऊर्जा आपूर्तिमा असर परेको छ । यसले अन्तर्राष्ट्रिय बजारमा तेल मूल्य बढाउँदै मुद्रास्फीतिमा थप दबाब सिर्जना गरेको छ ।
डलास फेडकी लोगानले मुद्रास्फीति फेडको दीर्घकालीन २ प्रतिशत लक्ष्यमा फर्कन कति समय लाग्ने भन्नेबारे “बढ्दो चिन्ता” व्यक्त गरेकी छन् । महामारीपछिका वर्षहरूमा मूल्यवृद्धि लक्ष्यभन्दा माथि नै रहेको छ ।
क्लिभल्याण्ड फेडकी ह्याम्याकले मौद्रिक नीतिमा सहजता देखाउने संकेत उचित नभएको बताउँदै मुद्रास्फीतिको दबाब अझै व्यापक रहेको उल्लेख गरेकी छन् ।
यसले फेडभित्रै नीतिगत दिशाबारे गहिरो मतभेद देखिएको र आगामी दिनमा ब्याजदर बढाउने वा घटाउने निर्णय आर्थिक अवस्थामाथि निर्भर रहने संकेत दिएको छ ।
प्रतिक्रिया