आर्थिकन्यूज
जुम्ला । जुम्लाको कनकासुन्दरी गाउँपालिकाले संघीय सरकारका दुई महत्वपूर्ण निर्णयलाई उल्टाउँदै विद्यालय सञ्चालनसम्बन्धी आफ्नै निर्णय लागू गरेको छ । गाउँपालिकाले आइतबार पनि सार्वजनिक बिदा दिने संघीय निर्णयलाई नमान्ने र वैशाख ७ गतेदेखि नै नियमित पठनपाठन सुरु गर्ने निर्णय गरेको हो ।
आइतबार बसेको गाउँ कार्यपालिकाको बैठकले सामुदायिक विद्यालयहरूमा आइतबार बिदा नगर्ने तथा वैशाख ७ गतेदेखि विद्यालय सञ्चालन गर्ने निर्णय गरेको कार्यवाहक गाउँपालिका अध्यक्ष प्रेमकली बुढाले जानकारी दिइन् ।
संघीय सरकारले आइतबार समेत सार्वजनिक बिदा दिने तथा नयाँ शैक्षिक सत्रअन्तर्गत विद्यार्थी भर्ना अभियान वैशाख १५ गतेदेखि सञ्चालन गरी वैशाख २१ गतेबाट पठनपाठन सुरु गर्ने निर्णय गरेको थियो। तर उक्त निर्णयले हिमाली जिल्लाहरूमा पठनपाठन प्रभावित हुने निष्कर्षसहित कनकासुन्दरी गाउँपालिकाले स्थानीय आवश्यकता अनुसार फरक निर्णय गरेको हो ।
गाउँपालिकाद्वारा जारी सूचनामा जुम्ला जिल्लाका सामुदायिक विद्यालयहरूमा पौष महिनामा १५ दिन र माघ महिनामा ३० दिन गरी कुल ४५ दिन बिदा हुने भएकाले निर्धारित पाठ्यघण्टा र पाठ्यक्रम पूरा गर्न कठिन हुने उल्लेख गरिएको छ । त्यसैले विद्यार्थीहरूको सिकाइ उपलब्धिलाई ध्यानमा राख्दै वैशाख ७ गतेदेखि नियमित कक्षा सञ्चालन गर्ने र आइतबार पनि विद्यालय खुला राख्ने निर्णय गरिएको जनाइएको छ ।
जिल्लाका आठ स्थानीय तहहरूमध्ये संघीय निर्णयविपरीत यस्तो कदम चाल्ने कनकासुन्दरी पहिलो पालिका बनेको छ । गाउँपालिकाले यस निर्णयलाई स्थानीय सरकारको स्वायत्त अधिकारको प्रयोगका रूपमा प्रस्तुत गरेको छ ।
प्रतिक्रिया